Si-phian 91 - 現代台語譯本羅馬字版

Siōng-tè Sī Lán ê Pó-hō͘-chiá

¹ Chhē Chì-koân ê Siōng-tè chòe pī-lān-só͘ ê lâng, ōe khiā-khí tī Choân-lêng-chiá ê ìm-ńg-ē.

² I tùi Siōng Chú kóng, “Lí sī góa ê pī-lān-só͘, góa ê pó-lúi, sī góa só͘ óa-khò ê Siōng-tè.”

³ Siōng Chú beh kiù lí thoat-lī tng chiáu-á ê lô-bāng, kap tì-miā ê un-e̍k.

⁴ I beh ēng si̍t kā lí áⁿ--teh, hō͘ lí bih tī I ê si̍t-kó͘-ē; I ê sìn-si̍t chòe tōa-sòe ê tún-pâi pó-hō͘ lí.

⁵ Lí bián kiaⁿ mî--sî ê khióng-pò͘, á-sī ji̍t--sî siā--lâi ê chìⁿ;

⁶ mā m̄-bián kiaⁿ o͘-àm tiong liû-hêng ê un-e̍k, á-sī ji̍t tiong-tàu húi-bia̍t lâng ê to̍k-chèng.

⁷ Ū kui-chheng lâng lek lo̍h-khì lí ê tò-pêng, ū kui-bān lâng tó lo̍h-khì lí ê chiàⁿ-pêng, chiah-ê chai-lān bōe lîm-kàu lí.

⁸ M̄-kú lí ōe chhin-ba̍k khòaⁿ--kìⁿ, ōe khòaⁿ-tio̍h pháiⁿ-lâng siū pò-èng.

⁹ Lí chhē Siōng Chú chòe pī-lān-só͘, ēng Chì-koân Siōng-tè chòe khiā-khí ê só͘-chāi;

¹⁰ chai-hāi bōe lîm-kàu lí, un-e̍k mā bōe óa-kūn lí ê pò͘-pîⁿ.

¹¹ In-ūi I beh ūi-tio̍h lí hoan-hù I ê sù-chiá, tī lí só͘ kiâⁿ it-chhè ê lō͘ pó-hō͘ lí.

¹² In beh ēng chhiú hû lí, hō͘ lí ê kha bōe tak-tio̍h chio̍h.

¹³ Lí beh ēng kha chàm sai kap to̍k-chôa, ta̍h-chhùi béng-sai kap tōa-bé chôa.

¹⁴ Siōng-tè kóng, “In-ūi i chin thiàⁿ góa, góa beh kái-kiù i; in-ūi i bat góa ê miâ, góa beh kā i an-tì tī an-choân ê só͘-chāi.

¹⁵ I kiû-kiò góa, góa beh ìn i; i tī gûi-kip ê sî, góa beh kap i tông-chāi; góa beh kái-kiù i, hō͘ i ū chun-êng.

¹⁶ Góa beh sù i tn̂g-hè-siū hō͘ i boán-chiok, hō͘ i khòaⁿ-kìⁿ góa ê kiù-un.”

The Bible Society in Taiwan

Lean sinn:

Ceanglaichean taic

Sanasan