Si-phian 9 - 現代台語譯本羅馬字版

Kám-siā Siōng-tè ê Kong-gī
Tāi-pi̍t ê si, kau hō͘ sèng-ga̍k-tiúⁿ; ēng ko-im chhiùⁿ.

¹ Siōng Chú ah, góa beh choân-sim kám-siā lí; góa beh pò-iông lí it-chhè kî-biāu ê chok-ûi.

² Góa beh in-ūi lí hoaⁿ-hí khoài-lo̍k; Chì-koân ê Siōng-tè ah, góa beh chheng-chàn lí ê miâ.

³ Góa ê tùi-te̍k oa̍t-tńg-sin thiat-thè poa̍h-tó, lóng tī lí ê bīn-chêng bia̍t-bông.

⁴ Lí ū thòe góa sin-oan, thòe góa piān-hō͘; lí chē tī pó-chō, chiàu kong-gī sím-phòaⁿ.

⁵ Lí chek-pī lia̍t-pang, hō͘ pháiⁿ-lâng bia̍t-bông; lí éng-oán chhat-siau in ê miâ.

⁶ Tùi-te̍k siū húi-bia̍t, éng-oán hong-hòe; lí húi-hoāi in ê siâⁿ, bô lâng koh ōe-kì-tit in.

⁷ M̄-kú Siōng Chú chē-ūi choh-ông kàu éng-oán; I í-keng an-tì I ê pó-chō beh sím-phòaⁿ.

⁸ I beh chiàu kong-gī sím-phòaⁿ sè-kan, chiàu chèng-ti̍t chhâi-phòaⁿ bān-bîn.

⁹ Siōng Chú sī siū ap-pek ê lâng ê iàu-sài, sī in hoān-lān ê sî ê pī-lān-só͘.

¹⁰ Bat lí ê miâ ê lâng ōe óa-khò lí; in-ūi Siōng Chú, lí m̄-bat khì-sak chhē-kiû lí ê lâng.

¹¹ Tio̍h chheng-chàn tī Sek-an choh-ông ê Siōng Chú, chiong I ê chok-ûi pò-iông tī bān-bîn ê tiong-kan.

¹² In-ūi I bô bōe-kì-tit khùn-khó͘ ê lâng, ūi lâng sin-oan ê Siōng-tè ōe thiaⁿ in ê ai-kiû.

¹³ Siōng Chú ah, kiû lí lîn-bín góa, lí ū tùi sí-bông ê mn̂g kiù góa chhut--lâi; kiû lí kàm-chhat oàn-hūn góa ê lâng án-chóaⁿ teh khó͘-chhó͘ góa,

¹⁴ hō͘ góa thang kóng-khí lí it-chhè thang o-ló ê tāi-chì. Góa beh tī Sek-an ê siâⁿ-mn̂g ūi-tio̍h lí ê chín-kiù hoan-ho͘.

¹⁵ Lia̍t-pang poa̍h-lo̍h ka-kī só͘ ku̍t ê hām-khiⁿ; in ê kha tîⁿ tī in pì-bi̍t tiuⁿ ê lô-bāng.

¹⁶ Siōng Chú í-keng hián-bêng ka-kī, si-hêng sím-phòaⁿ; pháiⁿ-lâng hō͘ ka-kī chhiú ê só͘-chòe tîⁿ--tio̍h.

¹⁷ Pháiⁿ-lâng lóng ōe lo̍h Im-hú; m̄ jīn Siōng-tè ê lia̍t-pang mā ōe án-ni.

¹⁸ Sàn-chhiah-lâng it-tēng bōe éng-oán hō͘ Siōng-tè bōe-kì--tit; khùn-khó͘-lâng ê ǹg-bāng it-tēng bōe éng-oán bô--khì.

¹⁹ Siōng Chú ah, kiû lí khí--lâi, m̄-thang hō͘ lâng khah iâⁿ; kiû lí hō͘ lia̍t-pang tī lí ê bīn-chêng siū sím-phòaⁿ.

²⁰ Siōng Chú ah, kiû lí hō͘ in kiaⁿ-hiâⁿ, hō͘ lia̍t-pang chai ka-kī put-kò sī ōe-sí ê lâng nā-tiāⁿ.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan