Bìoball air-loidhne

Si-phian 89 - 現代台語譯本羅馬字版

Ūi Biān-lîm Chai-lān ê Kok-ka Kî-tó
Í-su-la-lâng Í-thàm kà-sī ê si.

¹ Góa beh éng-oán chhiùⁿ-koa chheng-chàn Siōng Chú ê chû-ài, beh sè-sè-tāi-tāi soan-iông lí ê sìn-si̍t.

² Góa bat kóng, “Lí ê chû-ài éng-oán kian-li̍p; lí ê sìn-si̍t chhin-chhiūⁿ thiⁿ bōe tōng-iâu.”

³ Lí ū kóng, “Góa kap góa kéng-soán ê lâng li̍p-iok, tùi góa ê po̍k-jîn Tāi-pi̍t soan-sè,

⁴ ‘Góa beh kiàn-li̍p lí ê hō͘-tāi kàu éng-oán, kian-kò͘ lí ê pó-chō kàu bān-tāi.’”

⁵ Siōng Chú ah, goān thiⁿ chheng-chàn lí kî-biāu ê chok-ûi, thiⁿ-sài tī chū-hōe tiong siōng-chàn lí ê sìn-si̍t.

⁶ Tī khong-tiong tó chi̍t ê ōe-pí-tit Siōng Chú? Chèng sîn-bêng tiong tó chi̍t ê ōe chhin-chhiūⁿ Siōng Chú?

⁷ I tī thiⁿ-sài ê gī-hōe tiong sī ū tōa ui-giâm ê Siōng-tè, pí it-chhè tī I sì-ûi ê sîn-bêng koh-khah thang kiaⁿ-ùi.

⁸ Siōng Chú — Bān-kun ê Thóng-sòe Siōng-tè ah, lí ê tōa koân-lêng tó chi̍t ê ōe-tàng kap lí pí? Lí tī ta̍k-hāng tāi-chì lóng hián-chhut sìn-si̍t.

⁹ Hái-chúi tiòng-koân, lí kā i koán-chè; hái-éng giâ--khí-lâi, lí hō͘ i pêng-chēng.

¹⁰ Lí chi̍t-ē-chhiú chiū phah-chhùi hái-koài La-hap-pek; lí ēng tōa khùi-la̍t ê chhiú phah-sòaⁿ tùi-te̍k.

¹¹ Thiⁿ sio̍k lí, tōe mā lí ê; sè-kài kap bān-mi̍h lóng sī lí só͘ kiàn-li̍p.

¹² Lâm kap pak sī lí só͘ chhòng-chō; Tha-po̍k-soaⁿ kap Hek-bûn-soaⁿ lóng hoaⁿ-hí chheng-chàn lí ê miâ.

¹³ Lí ê chhiú-kut ū koân-lêng; lí ê chhiú ū la̍t, lí ê chiàⁿ-chhiú gia̍h-koân-koân.

¹⁴ Kong-gī kap chèng-ti̍t sī lí pó-chō ê tōe-ki; chû-ài kap sìn-si̍t kiâⁿ tī lí bīn-chêng.

¹⁵ Ōe-hiáu tùi lí hoan-ho͘ ê lâng chin ū hok-khì! Siōng Chú ah, in beh tè lí ê bīn hoat-chhut ê kng lâi kiâⁿ.

¹⁶ In kui-ji̍t in-ūi lí ê miâ hoaⁿ-hí, in-ūi lí ê kong-gī khoài-lo̍k.

¹⁷ Lí sī in kî-biāu ê khùi-la̍t; in-ūi lí ê un-tián, goán ōe tit-tio̍h sèng-lī.

¹⁸ Siōng Chú sī goán ê pó-hō͘-chiá; Í-sek-lia̍t sîn-sèng ê Siōng-tè sī goán ê Kun-ông.

Siōng-tè tùi Tāi-pi̍t ê Èng-ún

¹⁹ Lí chá bat tī īⁿ-siōng tiong tùi lí tiong-si̍t ê chú-bîn kóng, “Góa ū ēng hoa-koan tì tī ióng-sū ê thâu-khak; góa tùi chú-bîn tiong kéng-soán i, ko-seng i.

²⁰ Góa chhē-tio̍h góa ê po̍k-jîn Tāi-pi̍t, ēng sèng-iû boah i.

²¹ Góa ê chhiú beh chi-chhî i; góa ê chhiú-kut beh sù i khùi-la̍t.

²² Tùi-te̍k bô hoat-tō͘ ēng kè-tì iâⁿ-kè i; hiong-ok ê lâng bô hoat-tō͘ khún-pek i.

²³ Góa beh tī i ê bīn-chêng phah-chhùi i ê tùi-te̍k, phah-pāi hiah-ê oàn-hūn i ê lâng.

²⁴ Góa ê sìn-si̍t kap góa ê chû-ài beh kap i tông-chāi, in-ūi góa ê miâ, i ōe tit-tio̍h sèng-lī.

²⁵ Góa beh hō͘ i ê chhiú chhun kàu Tōe-tiong-hái, i ê chiàⁿ-chhiú chhun kàu Iù-hoat-la-tí-hô.

²⁶ I beh tùi góa kóng, ‘Lí sī góa ê Pē, góa ê Siōng-tè, sī chín-kiù góa ê chio̍h-pôaⁿ.’

²⁷ Góa beh siat-li̍p i chòe tōa-kiáⁿ, chòe sè-chiūⁿ siōng-tōa ê kun-ông.

²⁸ Góa beh tùi i chhî-siú chû-ài kàu éng-oán; góa kap i só͘ li̍p ê iok it-tēng bōe kái-piàn.

²⁹ Góa beh pó-siú i ê hō͘-tāi kàu éng-oán, hō͘ i ê pó-chō chhin-chhiūⁿ thiⁿ hiah-ni̍h kú-tn̂g.

³⁰ “I ê kiáⁿ-sun nā khì-sak góa ê Lu̍t-hoat, bô chun-siú góa ê bēng-lēng,

³¹ ûi-pōe góa ê kui-lē, bô chun-hêng góa ê kài-bēng,

³² góa beh ēng koáiⁿ-á hêng-hoa̍t in ê kè-sit, ēng piⁿ chhú-hoa̍t in ê chōe-ok.

³³ Chóng-sī góa it-tēng bōe tùi i siu-hôe góa lóng-chóng ê chû-ài, mā bōe ûi-pōe góa ê sìn-si̍t.

³⁴ Góa it-tēng bōe ûi-hoán góa ê iok, mā bōe kái-piàn góa kóng ê ōe.

³⁵ “Góa kí ka-kī ê sèng-kiat kian-koat li̍p-sè, choa̍t-tùi bōe tùi Tāi-pi̍t kóng pe̍h-chha̍t.

³⁶ I ê hō͘-tāi ōe thoân kàu éng-oán, i ê pó-chō tī góa ê bīn-chêng chhin-chhiūⁿ ji̍t-thâu hiah-ni̍h kú-tn̂g;

³⁷ chhin-chhiūⁿ ge̍h éng-oán ún-kò͘, tī thiⁿ-téng choh khak-si̍t ê kiàn-chèng.”

Ūi Kun-ông Chiàn-pāi Ai-siong

³⁸ Chóng-sī lí ū tùi lí boah-iû soán-li̍p--ê hoat siū-khì, kā i kū-choa̍t khì-sak.

³⁹ Lí hòe-tû kap lí ê po̍k-jîn só͘ li̍p ê iok, chiong i ê hoa-koan tàn tī thô͘-kha thún-ta̍h.

⁴⁰ Lí thiah-húi i só͘-ū ê siâⁿ-chhiûⁿ, hō͘ i ê pó-lúi pìⁿ-chòe pha-hng ê só͘-chāi.

⁴¹ Kè-lō͘-lâng lóng kā i chhiúⁿ-toa̍t; keh-piah-kok lóng kā i lêng-jio̍k.

⁴² Lí hō͘ i tùi-te̍k ê chiàⁿ-chhiú gia̍h-koân, hō͘ in lóng hoaⁿ-hí.

⁴³ Lí hō͘ i ê to-kiàm tun--khì bōe-tàng ēng, hō͘ i tī kau-chiàn ê sî chiàn-pāi.

⁴⁴ Lí chiong i koân-pèng ê koáiⁿ chhiúⁿ--khí-lâi, chiong i ê pó-chō chhia-tó tī tōe--ni̍h.

⁴⁵ Lí kiám-chió i siàu-liân ê ji̍t-chí, hō͘ i tōa-tōa kiàn-siàu.

Khún-kiû Siōng-tè Chín-kiù

⁴⁶ Siōng Chú ah, lí beh bih jōa kú, kàu éng-oán sī--bô? Lí chhin-chhiūⁿ hé to̍h teh siū-khì beh jōa kú?

⁴⁷ Kiû lí tài-liām góa ê sìⁿ-miā hiah-ni̍h té, lí chhòng-chō ê sè-kan-lâng hiah-ni̍h khang-hu!

⁴⁸ Siáⁿ-lâng ōe-tàng kú-tn̂g oa̍h--teh, bô kìⁿ-tio̍h sí, ōe kiù ka-kī ê sìⁿ-miā thoat-lī Im-hú ê koân-sè?

⁴⁹ Chú ah, lí í-chêng ê chû-ài tī tó-ūi? Lí tùi Tāi-pi̍t li̍p-sè èng-ún ê sìn-si̍t tī tó-ūi?

⁵⁰ Chú ah, kiû lí ōe-kì-tit lí ê po̍k-jîn só͘ siū ê lêng-jio̍k, ōe-kì-tit góa ê sim án-chóaⁿ sêng-siū lia̍t-kok ê bú-jio̍k.

⁵¹ Siōng Chú ah, lí ê tùi-te̍k án-ni teh bú-jio̍k lí ê po̍k-jîn; lí boah-iû kéng-soán--ê kiâⁿ kàu tó-ūi, in lóng tè teh kā i lêng-jio̍k.

⁵² Goān chheng-chàn kui hō͘ Siōng Chú kàu éng-oán! Amen! Amen!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan