Si-phian 85 - 現代台語譯本羅馬字版

Kiû Siōng Chú Un-thāi I ê Chú-bîn
Khó-la hō͘-tāi ê si, kau hō͘ sèng-ga̍k-tiúⁿ.

¹ Siōng Chú ah, lí ū si-un hō͘ lí ê tōe; Í-sek-lia̍t siū-lia̍h ê lâng lí ū kái-kiù in tò--lâi.

² Lí ū sià-bián lí chú-bîn ê chōe-ok, chhat-siau in it-chhè ê chōe-kò.

³ Lí ū siu-hôe lí lóng-chóng ê siū-khì, soah lí béng-lia̍t ê siū-khì.

⁴ Chín-kiù goán ê Siōng-tè ah, kiû lí hō͘ goán tò-tńg--lâi, soah lí tùi goán ê siū-khì.

⁵ Lí kiám beh éng-oán tùi goán siū-khì? Kiám beh kè-sio̍k siū-khì kàu bān-tāi?

⁶ Lí kiám m̄ koh kā goán kiù oa̍h, hō͘ lí ê chú-bîn in-ūi lí lâi hoaⁿ-hí?

⁷ Siōng Chú ah, kiû lí hō͘ goán keng-giām lí put-piàn ê thiàⁿ, chiong lí ê kiù-un sù hō͘ goán.

⁸ Góa beh thiaⁿ Chú Siōng-tè só͘ beh kóng ê ōe; in-ūi I beh tùi I ê chú-bîn, chiū-sī sèng ê chú-bîn, èng-ún sù pêng-an hoân-êng; chóng-sī in m̄-thang tò-tńg-khì kiâⁿ gû-gōng ê lō͘.

⁹ I it-tēng ōe chín-kiù kèng-ùi I ê lâng, hō͘ I ê êng-kng lîm-chāi tī lán kéng-lāi.

¹⁰ Chû-ài kap sìn-si̍t saⁿ-tú; kong-gī kap hô-pêng sio-lám.

¹¹ Sìn-si̍t tùi tōe hoat-chhut; kong-gī tùi thiⁿ kàng-lo̍h.

¹² Siōng Chú sù hó-mi̍h; lán ê thó͘-tōe tōa hong-siu.

¹³ Kong-gī ōe kiâⁿ tī Siōng Chú thâu-chêng, ūi I chún-pī tō-lō͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan