Bìoball air-loidhne

Si-phian 84 - 現代台語譯本羅馬字版

Him-bō͘ Siōng-tè ê Tiān-īⁿ
Khó-la hō͘-tāi ê si, kau hō͘ sèng-ga̍k-tiúⁿ; ēng Ka-te̍k ê ga̍k-khì phōaⁿ-chàu.

¹ Siōng Chú — Bān-kun ê Thóng-sòe ah, lí khiā-khí ê só͘-chāi hō͘ lâng hiah-ni̍h ì-ài!

² Góa loân-bō͘ Siōng Chú ê tiâⁿ kàu beh hūn--khì! Góa ê sim-sîn ǹg éng-oa̍h ê Siōng-tè hoaⁿ-hí chhiùⁿ-koa.

³ Siōng Chú — Bān-kun ê Thóng-sòe, góa ê Ông, góa ê Siōng-tè ah, chhek-chiáu-á tī lí ê chè-tôaⁿ piⁿ choh-siū; liân ìⁿ-á mā tī hia ūi-tio̍h ka-kī chhē-tio̍h áⁿ-kiáⁿ ê siū.

⁴ Khiā-khí tī lí tiān ê tiâⁿ ê lâng chin ū hok-khì! In chheng-chàn lí bô-soah!

⁵ Tùi lí tit-tio̍h khùi-la̍t ê lâng chin ū hok-khì! In pek-chhiat ài chiūⁿ Sek-an-soaⁿ tiâu-sèng.

⁶ In keng-kè ê ta-sò soaⁿ-kok lóng pìⁿ-chòe chôaⁿ-goân; chhiu-ú kàng-lo̍h, hok-khì móa-móa.

⁷ In ná kiâⁿ ná ū la̍t, lóng beh tī Sek-an tiâu-kìⁿ Siōng-tè.

⁸ Siōng Chú — Bān-kun ê Thóng-sòe Siōng-tè ah, kiû lí thiaⁿ góa ê kî-tó! Ngá-kok ê Siōng-tè ah, kiû lí àⁿ hī-khang lâi thiaⁿ!

⁹ Pó-hō͘ goán ê Siōng-tè ah, kiû lí koàn-kò͘! Kiû lí sù-hok hō͘ lí só͘ siat-li̍p ê ông!

¹⁰ Tī lí ê tiâⁿ tiàm chi̍t ji̍t, khah iâⁿ tī pa̍t-ūi tiàm chi̍t-chheng ji̍t! Góa lêng-khó tī góa Siōng-tè ê chhù kò͘-mn̂g, mā m̄-goān tiàm tī siâ-ok ê lâng ê chhù-lāi.

¹¹ In-ūi Chú Siōng-tè sī ji̍t-thâu, sī tún-pâi: I hō͘ lán un-hūi kap kong-êng; I m̄-bat lâu chi̍t hāng hó-mi̍h bô hō͘ chèng-ti̍t ê lâng.

¹² Siōng Chú — Bān-kun ê Thóng-sòe ah, sìn-khò lí ê lâng chin ū hok-khì!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan