Si-phian 83 - 現代台語譯本羅馬字版

Kiû Siōng Chú Siau-bia̍t Tùi-te̍k
A-sat ê si.

¹ Siōng-tè ah, kiû lí m̄-thang tiām-tiām; Siōng-tè ah, kiû lí m̄-thang bô khui-chhùi, bô chhut-siaⁿ.

² In-ūi lí ê tùi-te̍k teh jiáu-loān; oàn-hūn lí ê lâng teh hoán-poān.

³ In ēng kan-chà ê kè-bô͘ beh hāi lí ê chú-bîn; in chham-siông beh hāi lí pó-hō͘ ê lâng.

⁴ In kóng, “Lâi, lán lâi siau-bia̍t in, hō͘ in bông kok, hō͘ Í-sek-lia̍t ê miâ éng-oán siau-sit.”

⁵ In tâng-sim chham-siông, li̍p-iok liân-bêng beh tùi-khòng lí;

⁶ in chiū-sī tòa pò͘-pîⁿ ê Í-tong kap Í-si̍t-má-lī-lâng, Mô͘-ap kap Hā-kah-lâng,

⁷ Ka-pa-le̍k, A-bûn, kap A-má-le̍k, Hui-lī-sū, í-ki̍p Thài-ní ê chū-bîn;

⁸ A-su̍t mā kap in liân-ha̍p, chòe Lô-tek kiáⁿ-sun ê liân-bêng.

⁹ Kiû lí tùi-hù in chhin-chhiūⁿ tùi-hù Bí-tiân-lâng, chhin-chhiūⁿ lí tī Ki-sūn-hô tùi-hù Se-se-la kap Iâ-pin.

¹⁰ In tī Ún To-ní bia̍t-bông, pìⁿ-chòe tōe-chiūⁿ ê pùn-sò.

¹¹ Kiû lí hō͘ in ê léng-siù chhin-chhiūⁿ Gô-li̍p kap Se-i-pek, hō͘ in ê kun-tiúⁿ lóng chhin-chhiūⁿ Se-pa kap Sat-bō͘-ná.

¹² In kóng, “Lán tio̍h lâi-khì, kā Siōng-tè ê bo̍k-tiûⁿ chiàm-chòe lán ê.”

¹³ Góa ê Siōng-tè ah, kiû lí hō͘ in chhin-chhiūⁿ kńg-lê-á-hong kńg--khí-lâi ê tîn-ai, chhin-chhiūⁿ hō͘ hong chhe-cháu ê chháu-á-iù.

¹⁴ Hé án-chóaⁿ sio chhiū-nâ, hé-iām án-chóaⁿ sio soaⁿ-niá,

¹⁵ kiû lí mā án-ni ēng lí ê kông-hong tui-kóaⁿ in, ēng lí ê pō-ú hō͘ in kiaⁿ-hiâⁿ.

¹⁶ Siōng Chú ah, kiû lí hō͘ in móa-bīn kiàn-siàu, thang lâi chhē-kiû lí.

¹⁷ Goān in éng-oán kiàn-siàu kiaⁿ-hiâⁿ; goān in làu-khùi bia̍t-bông.

¹⁸ Goān in chai chí-ū lí sī Siōng Chú, sī chiáng-koán choân-tōe Chì-koân ê Siōng-tè.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan