Bìoball air-loidhne

Si-phian 81 - 現代台語譯本羅馬字版

Siōng-tè ê Liông-siān kap Í-sek-lia̍t ê Siâ-ok
A-sat ê si, kau hō͘ sèng-ga̍k-tiúⁿ; ēng Ka-te̍k ê tiāu.

¹ Siōng-tè sī lán ê khùi-la̍t, tio̍h tōa-siaⁿ chheng-chàn I; tio̍h chhiùⁿ-koa chheng-chàn Ngá-kok ê Siōng-tè.

² Tio̍h chhiùⁿ si-koa, iô lin-long-kó͘, tôaⁿ hó-thiaⁿ ê khîm kap sek.

³ Tio̍h tī chhoe-it cha̍p-gō͘, lán choeh-kî ê ji̍t, pûn sàu-kak.

⁴ In-ūi che sī ūi Í-sek-lia̍t tēng ê kui-lē, sī Ngá-kok ê Siōng-tè ūi in siat ê lé-gî.

⁵ I kong-kek Ai-ki̍p-tōe ê sî, ū kap Í-sek-lia̍t ê chú-bîn li̍p-iok. Tī hia góa thiaⁿ-kìⁿ í-chêng m̄-bat thiaⁿ--tio̍h ê ōe.

⁶ Siōng-tè kóng, “Góa chiong in keng-thâu téng ê tāng-tàⁿ sóa-khui, hō͘ in pàng-lo̍h chhiú só͘ kōaⁿ tāng ê nâ-á.

⁷ Lín tī hoān-lān tiong kiû-kiò, góa ū kái-kiù lín; góa tùi lûi teh tân ê ba̍t-hûn tiong ìn-tap lín, tī Bí-lī-pa ê chúi-chôaⁿ piⁿ chhì-giām lín.

⁸ Góa ê chú-bîn ah, lín tio̍h thiaⁿ, góa beh kéng-kò lín; Í-sek-lia̍t ah, góa jōa-á-ni̍h ǹg-bāng lín thiaⁿ-thàn góa!

⁹ Lín tiong-kan m̄-thang ū pa̍t-ê sîn-bêng; gōa-pang ê sîn-bêng, lín m̄-thang kūi-pài.

¹⁰ Góa sī Siōng Chú — lín ê Siōng-tè; góa bat chhōa lín tùi Ai-ki̍p-tōe chiūⁿ--lâi. Lín ê chhùi tio̍h tōa khui, góa chiū hō͘ lín pá-chiok.

¹¹ “M̄-kú góa ê chú-bîn m̄ thiaⁿ góa ê ōe; Í-sek-lia̍t lóng m̄ chhap góa.

¹² Góa chiū chhut-chāi in sim ngī, hō͘ in chiàu ka-kī só͘ ài khì chòe.

¹³ Góa jōa-á-ni̍h ǹg-bāng góa ê chú-bîn thiaⁿ-thàn góa, Í-sek-lia̍t khéng kiâⁿ góa ê lō͘!

¹⁴ Góa chin kín chiū ōe chè-ap in ê tùi-te̍k, ēng chhiú tò-koat kong-kek in ê te̍k-jîn.

¹⁵ Oàn-hūn Siōng Chú ê lâng ōe tī I bīn-chêng soe-thè; in ōe éng-oán siū hêng-hoa̍t.

¹⁶ Siōng Chú beh ēng hó ê be̍h hō͘ Í-sek-lia̍t chia̍h, ēng tùi chio̍h-pôaⁿ chhut ê bi̍t hō͘ in boán-chiok.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan