Bìoball air-loidhne

« Roimhe

Air adhart »

Si-phian 78 - 現代台語譯本羅馬字版

Siōng-tè Ín-chhōa Pōe-ge̍k ê Chú-bîn
A-sat kà-sī ê si.

¹ Góa ê chú-bîn ah, tio̍h thiaⁿ góa ê kà-sī, chù-ì thiaⁿ góa kóng ê ōe.

² Góa beh khui-chhùi kóng phì-jū, beh kóng-chhut kó͘-chá ê ò-pì,

³ chiū-sī goán só͘ thiaⁿ--kìⁿ, só͘ chai, goán ê chó͘-sian só͘ thoân hō͘ goán ê sū.

⁴ Goán bô beh chiong chiah-ê sū tùi kiáⁿ-sun ún-môa, beh chiong Siōng Chú ê miâ-siaⁿ kap I ê koân-lêng, í-ki̍p I só͘ chòe kî-biāu ê sū, thoân hō͘ āu sè-tāi.

⁵ I tī Ngá-kok siat kài-bēng, tī Í-sek-lia̍t tēng Lu̍t-hoat, koh bēng-lēng lán ê chó͘-sian chiong chiah-ê thoân hō͘ in ê kiáⁿ-sun,

⁶ hō͘ hō͘-tāi, chiū-sī teh-beh chhut-sì ê kiáⁿ-sun chai; chiah-ê kiáⁿ-sun mā beh thoân hō͘ in ê kiáⁿ-kiáⁿ-sun-sun.

⁷ Án-ni, in thang chiong ǹg-bāng khǹg tī Siōng-tè, hō͘ in bô bōe-kì-tit Siōng-tè ê chok-ûi, chun-siú I ê kài-bēng;

⁸ chiah bián chhin-chhiūⁿ in chó͘-sian ê sè-tāi, ngī-sim pōe-ge̍k; in tùi Siōng-tè sim bô kian-tēng, sim-lêng bô chin-si̍t.

⁹ Í-hoat-liân ê kiáⁿ-sun gia̍h bú-khì kap keng-chìⁿ, cheng-chiàn ê ji̍t, khiok oa̍t-tńg-sin tô-cháu.

¹⁰ In bô chun-siú Siōng-tè ê iok, kū-choa̍t chiàu I ê Lu̍t-hoat seng-oa̍h.

¹¹ In bōe-kì-tit I ê chok-ûi, bōe-kì-tit I hō͘ in khòaⁿ-kìⁿ kî-biāu ê sū.

¹² I tī Ai-ki̍p-tōe, Só-an ê chhân-iá, tī in chó͘-sian ê ba̍k-chiu chêng chòe kî-īⁿ ê sū.

¹³ I kā hái hun-khui, hō͘ in kè--khì; I hō͘ chúi khiā--khí-lâi chhin-chhiūⁿ piah.

¹⁴ I ji̍t--sî ēng hûn chhōa in, kui-mî ēng hé ê kng ín-chhōa in.

¹⁵ I tī khòng-iá hō͘ chio̍h-pôaⁿ piak-li̍h, hō͘ in ū chin chōe chúi thang lim, chhin-chhiūⁿ tùi chhim-ian chhèng-chhut.

¹⁶ I hō͘ chúi tùi chio̍h-pôaⁿ chhèng-chhut, chhin-chhiūⁿ kang-hô lâu--lo̍h-lâi.

¹⁷ M̄-kú in iáu kè-sio̍k tek-chōe I, tī khòng-iá pōe-ge̍k Chì-koân Siōng-tè.

¹⁸ In sim-lāi chhì-thàm Siōng-tè, chiàu ka-kī ì-ài--ê kiû chia̍h-mi̍h.

¹⁹ In lām-sám gī-lūn Siōng-tè, kóng, “Siōng-tè kiám ōe tī khòng-iá pān-toh?

²⁰ I bat kòng chio̍h-pôaⁿ, hō͘ chúi chhèng-chhut, khoe-chúi móa--chhut-lâi; I kiám ōe sù bí-niû? I kiám ōe kā I ê chú-bîn chún-pī bah?”

²¹ Só͘-í, Siōng Chú thiaⁿ--tio̍h chiū siū-khì, ēng iām-hé sio Ngá-kok, tùi Í-sek-lia̍t hoat siū-khì.

²² In-ūi in m̄ sìn-ho̍k Siōng-tè, m̄ óa-khò I ê kiù-un.

²³ M̄-kú I iáu bēng-lēng téng-bīn ê kiong-chhong, koh khui thiⁿ ê mn̂g;

²⁴ I kàng-lo̍h má-ná hō͘ in chia̍h, chiong thiⁿ ê bí-niû sù hō͘ in.

²⁵ In ta̍k-ê lâng chia̍h thiⁿ-sài ê chia̍h-mi̍h; Siōng-tè sù bí-niû hō͘ in chia̍h kàu pá.

²⁶ I tùi thiⁿ khí tang-hong, ēng I ê koân-lêng chhe lâm-hong,

²⁷ I kàng-lo̍h bah hō͘ in, ná thô͘-hún hiah chōe, kàng-lo̍h pe-chiáu ná hái-soa hiah chōe,

²⁸ lo̍h tī in ê iâⁿ-tiong, tī in khiā-khí ê só͘-chāi ê sì-ûi.

²⁹ In chiū chia̍h, chia̍h kàu pá-pá; I ū chiàu in só͘ ài--ê hō͘ in.

³⁰ In só͘ ài--ê iáu-bē pá-chiok, chia̍h-mi̍h iáu tī chhùi-lāi ê sî,

³¹ Siōng-tè chiū tùi in hoat siū-khì, thâi-sí in tiong-kan ióng-chòng ê lâng, phah-tó Í-sek-lia̍t ê siàu-liân-lâng.

³² Sui-jiân án-ni, in kè-sio̍k hoān-chōe, bô in-ūi Siōng-tè kî-biāu ê chok-ûi lâi sìn I.

³³ Só͘-í I hō͘ in khang-khang kè-ji̍t, hō͘ in nî-nî tī kiaⁿ-hiâⁿ tiong keng-kè.

³⁴ Siōng-tè thâi in ê sî, in chiah lâi kiû I; oa̍t tò-tńg pek-chhiat chhē-kiû I.

³⁵ In chiah ōe-kì-tit Siōng-tè sī in ê pó-hō͘-chiá, Chì-koân-chiá Siōng-tè sī in ê Kiù-sio̍k-chú.

³⁶ M̄-kú in ēng chhùi kā I phô͘-tháⁿ, ēng chi̍h tùi I kóng pe̍h-chha̍t.

³⁷ In tùi I bô tiong-sìn, bô chin-si̍t siú I ê iok.

³⁸ M̄-kú I iáu chhiong-móa lîn-bín, sià-bián in ê chōe-kò, bô kā in húi-bia̍t, chi̍t-piàn koh chi̍t-piàn jím--teh, siū-khì bô lóng hoat--chhut-lâi.

³⁹ I tài-liām in put-kò sī ōe-sí ê lâng, sī chhe--kè-khì bōe koh tò-tńg--lâi ê hong.

⁴⁰ In tī khòng-iá put-sî pōe-ge̍k I, tī hong-po͘ hō͘ I iu-būn.

⁴¹ In chi̍t-piàn koh chi̍t-piàn chhì-thàm Siōng-tè, kek Í-sek-lia̍t sîn-sèng ê Siōng-tè siū-khì.

⁴² In bōe-kì-tit I ê koân-lêng, bōe-kì-tit I kái-kiù in thoat-lī tùi-te̍k ê ji̍t.

⁴³ I tī Ai-ki̍p án-chóaⁿ kiâⁿ sîn-jiah, tī Só-an ê chhân-iá hián-chhut kî-sū:

⁴⁴ I chiong in ê kang-hô pìⁿ-chòe huih, tì-kàu chúi lóng bōe-lim--tit.

⁴⁵ I hō͘ kui-kûn hô͘-sîn lâi in hia thun-chia̍h, hō͘ chhân-kap-á lâi sún-hāi.

⁴⁶ I chiong in ê thó͘-sán hō͘ chháu-meh-kong húi-hoāi, chiong in lô-khó͘ tit--tio̍h ê mi̍h hō͘ chháu-meh thun-chia̍h.

⁴⁷ I lo̍h-pha̍uh húi-hoāi in ê phû-tô-chhiū, lo̍h-sng húi-hoāi in ê sng-châi-chhiū;

⁴⁸ koh chiong in ê cheng-siⁿ kau hō͘ peng-pha̍uh, chiong in kui-kûn ê cheng-siⁿ kau hō͘ sih-nà.

⁴⁹ I hoat tōa siū-khì, ēng siū-khì, thòng-hūn, khó͘-lān chòe kui-tīn ê sù-chiá lâi kā in húi-bia̍t.

⁵⁰ I lún bōe tiâu siū-khì, bô kò͘-liām in ê sìⁿ-miā, ēng un-e̍k kā in húi-bia̍t.

⁵¹ I thâi-sí Ai-ki̍p só͘-ū ê tōa-kiáⁿ, tī Hâm ê pò͘-pîⁿ phah-sí in ê thâu-chiūⁿ-kiáⁿ.

⁵² I chhin-chhiūⁿ teh chhōa iûⁿ kā ka-kī ê chú-bîn chhōa--chhut-lâi, chhōa in keng-kè khòng-iá.

⁵³ I chhōa in, hō͘ in an-ún bô kiaⁿ-hiâⁿ, hō͘ hái im-sí in ê tùi-te̍k.

⁵⁴ I koh chhōa in kàu sèng-tōe ê kéng-lāi, kàu I ēng khùi-la̍t tit--tio̍h ê soaⁿ-tōe.

⁵⁵ I tī in ê bīn-chêng kóaⁿ-chhut lia̍t-pang; ēng soh-á niû thó͘-tōe hō͘ Í-sek-lia̍t ê chi-cho̍k chòe sán-gia̍p, hō͘ in khiā-khí tī ka-kī ê pò͘-pîⁿ.

⁵⁶ In iû-goân chhì-thàm Chì-koân-chiá Siōng-tè, pōe-ge̍k I, bô siú I ê kài-bēng.

⁵⁷ In sit-sìn pōe-ge̍k, kap in ê chó͘-sian siâng-khoán, chhin-chhiūⁿ lēng--khì ê keng bōe-khò--tit.

⁵⁸ In pài soaⁿ-thâu-tôaⁿ, jiá I siū-khì, pài tiau-khek ê ngó͘-siōng, hō͘ I thòng-hūn.

⁵⁹ Siōng-tè thiaⁿ--tio̍h chin siū-khì, chiū oân-choân khì-sak Í-sek-lia̍t.

⁶⁰ I khì-sak Sī-lô ê hōe-bō͘, khì-sak I tī lâng ê tiong-kan só͘ tah ê pò͘-pîⁿ.

⁶¹ I ún-chún lâng kā iok-kūi chhiúⁿ--khì, chiong I ê khùi-la̍t kap êng-kng kau hō͘ tùi-te̍k.

⁶² I tùi I ê ke-gia̍p Í-sek-lia̍t hoat siū-khì, chiong I ê chú-bîn kau hō͘ tùi-te̍k sat-hāi.

⁶³ In ê siàu-liân-lâng siū chiàn-hé sio-bia̍t; in ê chāi-sek-lú bōe-tàng thiaⁿ-tio̍h kiat-hun ê chiok-koa.

⁶⁴ In ê chè-si tó tī to-ē; in ê kóaⁿ-hū khàu bōe chhut--lâi.

⁶⁵ Hit-sî Chú chhin-chhiūⁿ lâng khùn cheng-sîn, chhin-chhiūⁿ ióng-sū chiú-āu hán-hoah.

⁶⁶ I chiū kā tùi-te̍k phah-thè, hō͘ in éng-oán siū lêng-jio̍k.

⁶⁷ I khì-sak Iok-sek ê hō͘-tāi, bô kéng-soán Í-hoat-liân chi-cho̍k.

⁶⁸ I kéng-soán Iû-tāi chi-cho̍k, I só͘ ì-ài ê Sek-an-soaⁿ.

⁶⁹ I khí-chō sèng-só͘ chhin-chhiūⁿ thiⁿ hiah koân, chhin-chhiūⁿ I kiàn-li̍p ê tāi-tōe éng-oán kian-kò͘.

⁷⁰ I kéng-soán I ê po̍k-jîn Tāi-pi̍t, tùi iûⁿ-tiâu chhōa i chhut--lâi,

⁷¹ hō͘ i bô koh iúⁿ-chhī iûⁿ-kûn, sī beh hō͘ i bo̍k-ióng Chú ê chú-bîn Ngá-kok, I ê ke-gia̍p Í-sek-lia̍t.

⁷² Tāi-pi̍t chiū ēng sûn-chèng ê sim bo̍k-ióng in, ēng láu-liān ê chhiú ín-chhōa in.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan