Bìoball air-loidhne

Si-phian 77 - 現代台語譯本羅馬字版

Khó͘-lān Tiong ê An-ùi
A-sat ê si, chiàu Iâ-tō͘-tùn ê choh-hoat, kau hō͘ sèng-ga̍k-tiúⁿ.

¹ Góa beh tùi Siōng-tè tōa-siaⁿ kiû-kiò, tùi Siōng-tè chhut tōa-siaⁿ, I ōe àⁿ hī-khang thiaⁿ.

² Tī hoān-lān ê ji̍t góa chhē Chú, tī mî--sî gia̍h-chhiú kî-tó bô-thêng; góa ê sim m̄-khéng siū an-ùi.

³ Góa siàu-liām Siōng-tè, chiū thó͘-khùi ai-oàn; góa chēng-chēng siūⁿ, chiū lóe-chì sit-bāng.

⁴ Lí hō͘ góa ba̍k-chiu kim-khok-khok khùn bōe khì; góa hoân-ló kah lóng bōe kóng-ōe.

⁵ Góa tui-liām kè-khì ê ji̍t-chí, hôe-sióng kó͘-chá ê nî.

⁶ Góa mî--sî chēng-chēng siūⁿ; góa bong sim-koaⁿ ka-kī mn̄g, sim-sîn siông-sè séng-chhat.

⁷ Chú kiám ōe éng-oán pàng-sak lán? I kiám bōe koh si-un hō͘ lán?

⁸ I ê chû-ài kiám ōe éng-kiú siau-sit? I ê èng-ún kiám ōe éng-oán lo̍k-khong?

⁹ Siōng-tè kiám bōe-kì-tit si-un, kiám í-keng ēng siū-khì tāi-thòe I ê chû-pi?

¹⁰ Góa kóng, “Góa siōng thòng-sim--ê, chiū-sī Chì-koân Siōng-tè bô koh ū khùi-la̍t.”

¹¹ Góa beh kóng-khí Siōng Chú lí ê chok-ûi, siàu-liām lí chá-sî ê sîn-jiah.

¹² Góa beh chhim-su lí ê chok-ûi, chēng-chēng siūⁿ lí ê só͘-chòe.

¹³ Siōng-tè ah, lí ê tō-lō͘ sîn-sèng; kiám ū sîn-bêng chhin-chhiūⁿ lí chiah-ni̍h úi-tāi?

¹⁴ Lí sī kiâⁿ kî-sū ê Siōng-tè; lí bat tī bān-bîn tiong hián-sī lí ê koân-lêng.

¹⁵ Lí bat ēng lí ê chhiú sio̍k-hôe lí ê chú-bîn, kái-kiù Ngá-kok kap Iok-sek ê kiáⁿ-sun.

¹⁶ Siōng-tè ah, tōa-chúi kìⁿ-tio̍h lí, tōa-chúi kìⁿ-tio̍h lí lóng kiaⁿ-hiâⁿ; chhim-ian mā ngia̍uh-ngia̍uh-chhoah.

¹⁷ Ba̍t-hûn piàⁿ-lo̍h hō͘-chúi, kiong-chhong tân-lûi, lí ê sih-nà sì-kòe siā.

¹⁸ Kńg-lê-á-hong lāi-bīn ū lí tân-lûi ê siaⁿ; sih-nà ê kng sih kàu choân-tōe; tōe ngia̍uh-ngia̍uh-chhoah tōa iô-tāng.

¹⁹ Hái-tiong ū lí ê tō-lō͘, tōa-chúi tiong ū lí ê lō͘-kèng; lí ê kha-jiah bô lâng chai.

²⁰ Lí bat ēng Mô͘-se A-lûn ê chhiú, chhōa lí ê chú-bîn chhin-chhiūⁿ teh chhōa iûⁿ-kûn.

The Bible Society in Taiwan

Lean sinn:

Ceanglaichean taic

Sanasan