Bìoball air-loidhne

Si-phian 74 - 現代台語譯本羅馬字版

Kiû Siōng Chú Kái-kiù Kok-ka
A-sat kà-sī ê si.

¹ Siōng-tè ah, sī-án-chóaⁿ lí éng-oán pàng-sak goán? Sī-án-chóaⁿ lí tùi lí chháu-po͘ ê iûⁿ hoat siū-khì, khì kah phīⁿ-khang chhèng-ian?

² Kiû lí ōe-kì-tit lí chá-chêng kéng-soán ê chú-bîn, lí só͘ sio̍k-hôe chòe lí sán-gia̍p ê bîn-cho̍k, mā ōe-kì-tit lí só͘ khiā-khí ê Sek-an-soaⁿ.

³ Kiû lí kiâⁿ-lâi kú-kú pha-hng ê só͘-chāi, khòaⁿ tùi-te̍k thiat-tóe húi-hoāi ê sèng-só͘.

⁴ Lí ê tùi-te̍k tī lí tiān-lāi hoan-ho͘, chhāi in ê kî chòe kì-hō,

⁵ chhin-chhiūⁿ lâng gia̍h pó͘-thâu, chhò chhiū-nâ ê chhiū.

⁶ Sèng-só͘ lāi-bīn it-chhè ê tiau-khek, in ēng pó͘-thâu kap thûi lóng-chóng phò-hoāi.

⁷ In pàng-hé sio-húi lí ê sèng-só͘, phah lâ-sâm lí khiā-khí ê só͘-chāi.

⁸ In chham-siông kóng, “Lán lâi kā in thiat-tóe húi-hoāi.” In chiong ta̍k-ūi kèng-pài Siōng-tè ê só͘-chāi lóng sio-liáu-liáu.

⁹ Goán bô koh khòaⁿ-kìⁿ tiāu-thâu, mā bô koh ū sian-ti; chit-khoán chêng-hêng ōe kàu sím-mi̍h sî, goán tiong-kan bô lâng chai.

¹⁰ Siōng-tè ah, tùi-te̍k ki-chhì ōe kàu sím-mi̍h sî? Te̍k-jîn siat-to̍k lí ê miâ ōe kàu éng-oán mah?

¹¹ Lí sī-án-chóaⁿ chhiú kiu--khí-lâi m̄ chhap goán? Kiû lí chhiú chhun-chhut-lâi kā in húi-bia̍t.

¹² Chóng-sī Siōng-tè tùi kó͘-chá chiū-sī góa ê Ông, tī tōe-chiūⁿ si-hêng chín-kiù.

¹³ Lí bat ēng lí ê koân-lêng chiong hái pun-khui, kòng-phòa chúi-tiong hái-koài ê thâu-khak.

¹⁴ Lí bat kòng-chhùi hái-siù ê thâu-khak, hō͘ khòng-iá ê iá-siù chòe chia̍h-mi̍h.

¹⁵ Lí bat pun-khui chúi-goân kap hô-liû, bat hō͘ tn̂g-lâu ê kang-hô ta--khì.

¹⁶ Ji̍t--sî kap mî--sî, sī lí só͘ an-pâi; ji̍t-thâu kap kng-thé sī lí só͘ chhòng-chō.

¹⁷ Tōe-chiūⁿ it-chhè ê kài-hān sī lí só͘ tēng; hē-thiⁿ kap tang-thiⁿ sī lí só͘ siat.

¹⁸ Siōng Chú ah, kiû lí kì-tit tùi-te̍k án-chóaⁿ teh húi-pòng, gû-gōng ê lâng án-chóaⁿ teh siat-to̍k lí ê miâ.

¹⁹ Kiû lí m̄-thang chiong sûn-liông chú-bîn ê sìⁿ-miā kau hō͘ iá-siù, m̄-thang éng-oán bōe-kì-tit lí sàn-chhiah ê cho̍k-kûn.

²⁰ Kiû lí ōe-kì-tit kap goán li̍p ê iok, in-ūi tōe-chiūⁿ o͘-àm ê só͘-chāi lóng sī kiông-pō ê lâng ê châu-hia̍t.

²¹ Kiû lí m̄-thang hō͘ siū ap-chè ê lâng kiàn-siàu tńg--khì; kiû lí hō͘ khùn-khó͘ sàn-chhiah ê lâng chheng-chàn lí ê miâ.

²² Siōng-tè ah, kiû lí khí-lâi ūi ka-kī piān-hō͘, ōe-kì-tit gōng-lâng kui-ji̍t án-chóaⁿ teh húi-pòng lí.

²³ Kiû lí m̄-thang bōe-kì-tit lí tùi-te̍k ê hán-hoah, m̄-thang bōe-kì-tit khí-lâi kong-kek lí ê lâng bô-thêng ê chhiàng-siaⁿ.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan