Bìoball air-loidhne

Si-phian 72 - 現代台語譯本羅馬字版

Ūi Kun-ông Kî-tó
Só͘-lô-bûn ê si.

¹ Siōng-tè ah, kiû lí chiong lí kong-chèng ê phòaⁿ-toàn sù hō͘ ông; kiû lí chiong lí ê kong-gī sù hō͘ ông ê kiáⁿ,

² hō͘ i ōe chiàu kong-gī sím-phòaⁿ lí ê chú-bîn, chiàu kong-chèng phòaⁿ-toàn sio̍k lí khùn-khó͘ siū ap-chè ê lâng.

³ Goān tōa-soaⁿ tòa hô-pêng hō͘ i ê peh-sìⁿ, goān sió-soaⁿ hō͘ in hióng-siū hoân-êng.

⁴ I ōe thòe peh-sìⁿ tiong khùn-khó͘ ê lâng sin-oan; I ōe kái-kiù sàn-chhiah-lâng, ōe phah-chhùi ap-pek-chiá.

⁵ Goān in kèng-ùi lí ji̍t kú ge̍h chhim, ti̍t-kàu bān sè-tāi.

⁶ Goān ông chhin-chhiūⁿ hō͘-chúi lo̍h tī chháu koah-liáu ê hn̂g, chhin-chhiūⁿ ki̍p-sî ê hō͘-chúi lūn-te̍k thó͘-tōe.

⁷ Tī i chē-ūi ê ji̍t-chí gī-lâng ōe heng-ōng, kap ge̍h pîⁿ kú hióng-siū tōa hô-pêng.

⁸ I ōe chiáng-koân tùi chit-ê hái kàu hit-ê hái, tùi Tōa-hô ti̍t-kàu tōe-ke̍k.

⁹ Tòa tī khòng-iá ê lâng ōe kūi-lo̍h tī i bīn-chêng; i ê tùi-te̍k ōe oân-choân hâng-ho̍k.

¹⁰ Tha-si kap hái-tó ê lia̍t-ông lâi chìn-kòng; Sī-pa kap Se-pa ê ông lâi hiàn lé-mi̍h.

¹¹ Goān lia̍t-ông lóng phak-lo̍h pài i, bān-kok lóng ho̍k-sāi i.

¹² In-ūi sàn-chhiah-lâng kiû-kiò ê sî, i ōe kiù in; khùn-khó͘ bô i-óa ê lâng, i mā ōe kiù in.

¹³ I ōe lîn-bín khùn-khó͘ sàn-chhiah ê lâng; I ōe chín-kiù khùn-khó͘-lâng ê sìⁿ-miā.

¹⁴ I ōe kiù-sio̍k in thoat-lī ap-pek kap kiông-pō; I khòaⁿ in ê sìⁿ-miā chòe pó-pòe.

¹⁵ Goān ông bān-sòe! Goān i chiap-siū Sī-pa chìn-kòng ê kim. Goān peh-sìⁿ sî-siông ūi i kî-tó, kui-ji̍t chiok-hok i bô-thêng.

¹⁶ Goān chit-ê thó͘-tōe ngó͘-kok hong-siu, móa soaⁿ-phiâⁿ ū be̍h-sūi, chhin-chhiūⁿ Lê-pa-lūn ê chhiū-nâ hiah-ni̍h ōng. Goān siâⁿ-lāi, lâng chhin-chhiūⁿ tōe-chiūⁿ ê chháu bō͘-sēng heng-ōng.

¹⁷ Goān i ê miâ lâu kàu éng-oán, chhin-chhiūⁿ ji̍t-thâu kú-tn̂g liû-thoân. Lâng ōe in-ūi i tit-tio̍h hok-khì; bān-kok ōe chheng i ū hok-khì.

¹⁸ Chì-koân Siōng Chú — Í-sek-lia̍t ê Siōng-tè, chí-ū I kiâⁿ kî-īⁿ ê sū, eng-kai siū chheng-chàn.

¹⁹ Goān I êng-iāu ê miâ éng-oán siū chheng-chàn; goān I ê êng-iāu chhiong-móa choân-tōe. Amen! Amen!

²⁰ Iâ-se ê kiáⁿ Tāi-pi̍t ê kî-tó kàu chia kiat-sok.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan