Si-phian 71 - 現代台語譯本羅馬字版

Lāu-lâng ê Kî-tó

¹ Siōng Chú ah, góa óa-khò lí; kiû lí hō͘ góa éng-oán bōe tú-tio̍h kiàn-siàu.

² Kiû lí chiàu lí ê kong-gī chín-kiù góa, tháu-pàng góa; kiû lí àⁿ hī-khang thiaⁿ góa, kiù góa.

³ Kiû lí chòe góa khiā-khí ê chio̍h-pôaⁿ, hō͘ góa thang sî-siông tiàm hia. Lí í-keng koat-tēng beh kiù góa; lí sī góa ê pī-lān-só͘, góa ê pó-lúi.

⁴ Góa ê Siōng-tè ah, kiû lí kiù góa thoat-lī pháiⁿ-lâng ê chhiú, thoat-lī put-gī kap chân-jím ê lâng ê chhiú-thâu.

⁵ Chì-koân ê Siōng Chú ah, lí sī góa ê ǹg-bāng; tùi góa siàu-liân ê sî, lí it-ti̍t sī góa ê óa-khò.

⁶ Góa tùi thai--ni̍h chiū siū lí hû-chhî; hō͘ góa chhut lāu-bú ê pak-tó͘--ê, sī lí; góa beh put-sî chheng-chàn lí.

⁷ Chin chōe lâng khòaⁿ góa chòe kî-koài; m̄-kú lí sī góa kian-kò͘ ê pī-lān-só͘.

⁸ Góa ê chhùi chhiong-móa tùi lí ê chheng-chàn, kui-ji̍t kui êng-kng hō͘ lí.

⁹ Góa nî-lāu ê sî, kiû lí m̄-thang pàng-sak góa; góa khùi-la̍t soe-lám ê sî, kiû lí m̄-thang lī-khui góa.

¹⁰ Góa ê tùi-te̍k gī-lūn góa; tng-tán beh hāi góa sìⁿ-miā ê lâng teh chham-siông,

¹¹ kóng, “Siōng-tè í-keng kā i pàng-sak; taⁿ lâi tui i, lâi lia̍h i; in-ūi bô lâng beh kiù i.”

¹² Siōng-tè ah, kiû lí m̄-thang pàng góa hn̄g-hn̄g m̄ chhap góa; góa ê Siōng-tè ah, kiû lí kóaⁿ-kín lâi pang-chān góa.

¹³ Goān khòng-kò góa ê lâng tú-tio̍h kiàn-siàu bia̍t-bông; goān kè-bô͘ beh hāi góa ê lâng siū lêng-jio̍k làu-khùi.

¹⁴ M̄-kú góa beh sî-siông gióng-bōng lí, beh it-ti̍t chheng-chàn lí.

¹⁵ Sui-jiân lí kong-gī ê só͘-chòe kap chín-kiù ê chok-ûi sǹg bōe liáu, iáu-kú góa ê chhùi kui-ji̍t beh soan-iông.

¹⁶ Góa beh kóng-khí Chì-koân Siōng Chú tōa koân-lêng ê sū, kan-ta beh soan-iông lí ê kong-gī.

¹⁷ Siōng-tè ah, tùi góa siàu-liân ê sî lí chiū kà-sī góa, hiān-chāi góa iáu-teh pò-iông lí kî-biāu ê chok-ûi.

¹⁸ Siōng-tè ah, kàu góa nî-lāu, thâu-mn̂g pe̍h ê sî, kiû lí m̄-thang pàng-sak góa, hō͘ góa thang chiong lí ê khùi-la̍t thoân hō͘ ē chi̍t tāi, chiong lí ê tōa koân-lêng chí-sī chiong-lâi ê lâng.

¹⁹ Siōng-tè ah, lí ê kong-gī koân kàu tú-thiⁿ; Siōng-tè ah, lí ū kiâⁿ úi-tāi ê sū, siáⁿ-lâng ōe-tàng kap lí pí?

²⁰ Lí hō͘ góa keng-le̍k chin chōe tōa chai-lān, iáu-kú beh hō͘ góa koh oa̍h--khí-lâi, tùi tōe-ē siōng-chhim ê só͘-chāi koh khí--lâi.

²¹ Lí ōe chiong chun-êng ke-thiⁿ hō͘ góa, koh-chài an-ùi góa.

²² Góa ê Siōng-tè, góa beh tôaⁿ-sek chheng-chàn lí, chheng-chàn lí ê sìn-si̍t. Í-sek-lia̍t sîn-sèng ê Siōng-tè, góa beh tôaⁿ-khîm chheng-chàn lí.

²³ Góa sī lí só͘ kiù-sio̍k--ê, góa beh ēng choân sìⁿ-miā tōa-siaⁿ chhiùⁿ-koa chheng-chàn lí.

²⁴ Góa ê chi̍h beh kui-ji̍t kóng-khí lí ê kong-gī, in-ūi kè-bô͘ beh hāi góa ê lâng í-keng siū lêng-jio̍k kiàn-siàu.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan