Bìoball air-loidhne

Si-phian 69 - 現代台語譯本羅馬字版

Kî-kiû Pang-chān
Tāi-pi̍t ê si, kau hō͘ sèng-ga̍k-tiúⁿ; tiāu, ēng “Pek-ha̍p-hoe”.

¹ Siōng-tè ah, kiû lí kiù góa, in-ūi chúi í-keng im kàu góa ê ām-kún.

² Góa hām lo̍h-khì chhim ê thô͘-bê, kha ta̍h bōe tio̍h si̍t-tōe; góa lo̍h kàu chhim ê chúi-lāi, tōa-chúi im-ba̍t góa.

³ Góa in-ūi âu-kiò ià-siān, góa ê nâ-âu ta--khì; góa in-ūi thèng-hāu Siōng-tè, ba̍k-chiu hoe.

⁴ Bô lí-iû oàn-hūn góa ê lâng pí góa ê thâu-mn̂g khah chōe; bô-iân-bô-kò͘ tùi-te̍k góa beh húi-bia̍t góa ê lâng hui-siông kiông-béng. Góa bô thau-the̍h, kèng-jiân tio̍h hêng.

⁵ Siōng-tè ah, lí chai góa jōa-ni̍h gû-gōng; góa bô tùi lí ún-môa góa ê chōe-kò.

⁶ Chì-koân Siōng Chú — Bān-kun ê Thóng-sòe, kiû lí m̄-thang hō͘ gióng-bōng lí ê lâng in-ūi góa tì-kàu kiàn-siàu; Í-sek-lia̍t ê Siōng-tè ah, kiû lí m̄-thang hō͘ chhē-kiû lí ê lâng in-ūi góa siū lêng-jio̍k.

⁷ Góa ūi-tio̍h lí ê iân-kò͘ siū lóe-mē, móa-bīn kiàn-siàu.

⁸ Góa ê hiaⁿ-tī khòaⁿ góa chòe siⁿ-hūn-lâng; góa ê tông-pau khòaⁿ góa chòe gōa-kok-lâng.

⁹ Góa ūi-tio̍h lí ê tiān sim hé-jia̍t, kui-ê lâng lóng hō͘ thun--lo̍h-khì; lóe-mē lí ê lâng ê lóe-mē lóng lo̍h tī góa sin-chiūⁿ.

¹⁰ Góa thòng-sim lâu ba̍k-sái, kìm-chia̍h, hoán-tńg siū chèng-lâng lêng-jio̍k.

¹¹ Góa ēng môa-pò͘ chòe saⁿ chhēng; lâng hoán-tńg ēng góa chòe chhiàu-tâm.

¹² Chē tī siâⁿ-mn̂g-kháu ê lâng ēng góa chòe ōe-tôe; chùi-hàn ēng góa chòe koa-khek.

¹³ M̄-kú góa siū chiap-la̍p ê sî, Siōng Chú ah, góa tùi lí kî-tó; Siōng-tè ah, kiû lí chiàu lí hong-sēng ê chû-ài, chiàu lí chin-si̍t khó-khò ê chín-kiù lâi ìn góa.

¹⁴ Kiû lí kiù góa thoat-chhut thô͘-bê, hō͘ góa bô tîm--lo̍h-khì; kiû lí kiù góa thoat-lī oàn-hūn góa ê lâng, hō͘ góa thoat-chhut chhim ê chúi.

¹⁵ Kiû lí m̄-thang iông-ún tōa-chúi im-ba̍t góa; m̄-thang iông-ún chhim-ian thun-chia̍h góa, m̄-thang iông-ún hām-khiⁿ khàm-ba̍t góa.

¹⁶ Siōng Chú ah, in-ūi lí ū chì-tōa ê chû-ài, kiû lí ìn góa; kiû lí chiàu lí hong-sēng ê chû-pi oa̍t kè-lâi khòaⁿ góa.

¹⁷ M̄-thang bīn oa̍t-cháu m̄ khòaⁿ lí ê po̍k-jîn; góa tī hoān-lān ê tiong-kan, kiû lí kóaⁿ-kín lâi ìn góa.

¹⁸ Kiû lí óa-kūn góa lâi kiù-sio̍k góa; kiû lí kiù góa thoat-lī góa ê tùi-te̍k.

¹⁹ Góa siū--tio̍h ê lóe-mē, kiàn-siàu, lêng-jio̍k, lí lóng chai; te̍k-tùi góa ê lâng lí lóng bat.

²⁰ Lóe-mē hō͘ góa ê sim chhùi, hō͘ góa chhiong-móa iu-būn. Góa ǹg-bāng lâng tông-chêng, m̄-kú chi̍t ê to bô; ǹg-bāng lâng an-ùi, mā chhē bô.

²¹ In the̍h khó͘-táⁿ hō͘ góa chòe chia̍h-mi̍h; góa chhùi-ta, in ēng chhò͘ hō͘ góa lim.

²² Goān in ê iàn-se̍k pìⁿ-chòe in ka-kī ê lô-bāng; goān in ê hoân-êng an-tēng pìⁿ-chòe hām-chíⁿ.

²³ Goān in ê ba̍k-chiu hoe, bōe khòaⁿ--kìⁿ; goān lí hō͘ in ê io chhoah bōe thêng.

²⁴ Goān lí ê thòng-hūn piàⁿ tī in ê sin-chiūⁿ, hō͘ lí lia̍t-lia̍t ê siū-khì jip-tio̍h in.

²⁵ Goān in khiā-khí ê só͘-chāi pha-hng; goān in ê pò͘-pîⁿ bô lâng tòa.

²⁶ In-ūi in khún-pek hiah-ê hō͘ lí phah ê lâng; in ke-thiⁿ lí phah-siong ê lâng ê thòng-khó͘.

²⁷ Goān lí kā in chōe-siōng-ka-chōe; m̄-thang hō͘ in bô siū tēng-chōe.

²⁸ Goān lí kā in ê miâ tùi oa̍h-miā-chheh chhat-siau, m̄-thang lia̍t tī gī-lâng ê miâ-toaⁿ.

²⁹ Chóng-sī góa khùn-khó͘ iu-siong; Siōng-tè ah, in-ūi lí ê kiù-un kiû lí kā góa an-tì tī koân ê só͘-chāi.

³⁰ Góa beh ēng si-koa chheng-chàn Siōng-tè ê miâ, mā beh ēng kám-siā chun I chòe tōa.

³¹ Án-ni chòe ōe hō͘ Siōng Chú hoaⁿ-hí, pí hiàn gû, hiàn ū-kak ū-tôe ê gû-káng koh-khah hó.

³² Khùn-khó͘ ê lâng khòaⁿ--kìⁿ ōe hoaⁿ-hí; chhē-kiû Siōng-tè ê lâng ê sim ōe oa̍h--khí-lâi.

³³ In-ūi Siōng Chú thiaⁿ sàn-chhiah-lâng ê kî-kiû, bô khòaⁿ-khin ūi-tio̍h I siū koaiⁿ-kaⁿ ê lâng.

³⁴ Goān thiⁿ kap tōe chheng-chàn I, hái kap hit lāi-bīn it-chhè ê tōng-bu̍t lóng chheng-chàn I.

³⁵ In-ūi Siōng-tè beh kiù Sek-an, tiông-kiàn Iû-tāi ê siâⁿ; in ōe tit-tio̍h èng-ún ê tōe chòe sán-gia̍p, tī hia khiā-khí.

³⁶ I ê po̍k-jîn ê hō͘-tāi ōe sêng-siū hit-ê tōe; thiàⁿ I ê lâng ōe tī hia tòa--lo̍h-khì.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan