Bìoball air-loidhne

Si-phian 68 - 現代台語譯本羅馬字版

Sèng-lī ê Koa
Tāi-pi̍t ê si-koa, kau hō͘ sèng-ga̍k-tiúⁿ.

¹ Goān Siōng-tè khí--lâi, hō͘ I ê tùi-te̍k sì-sòaⁿ, hō͘ oàn-hūn I ê lâng tùi I ê bīn-chêng tô-cháu.

² Lí kā in kóaⁿ-sòaⁿ, chhin-chhiūⁿ kā ian chhe-sòaⁿ; in chhin-chhiūⁿ la̍h kìⁿ-tio̍h hé chiū iûⁿ--khì, pháiⁿ-lâng kìⁿ-tio̍h Siōng-tè ê bīn chiū siau-bia̍t.

³ Goān gī-lâng tī Siōng-tè bīn-chêng hoaⁿ-hí khoài-lo̍k; goān in hoaⁿ-hoaⁿ-hí-hí.

⁴ Tio̍h tùi Siōng-tè gîm-si, chhiùⁿ-koa chheng-chàn I ê miâ, tōa-tōa chheng-chàn chē-hûn lâi--ê Hit-ūi; I ê chheng-ho͘ sī Siōng Chú. Tio̍h tī I ê bīn-chêng khoài-lo̍k.

⁵ Siōng-tè tī I sèng ê só͘-chāi chòe ko͘-jî ê pē, kóaⁿ-hū ê pó-hō͘-chiá.

⁶ Siōng-tè hō͘ ko͘-toaⁿ ê lâng ū chhù thang tòa, chhōa koaiⁿ-kaⁿ ê lâng chhut-lâi tit-tio̍h chū-iû hióng-hok; m̄-kú I hō͘ pōe-ge̍k ê lâng tiàm tī khòng-hān ê tōe.

⁷ Siōng-tè ah, chá lí kiâⁿ tī lí ê chú-bîn thâu-chêng, keng-kè khòng-iá;

⁸ tōe kìⁿ-tio̍h Se-nāi ê Siōng-tè, tōa tín-tāng; thiⁿ tī Í-sek-lia̍t ê Siōng-tè bīn-chêng lo̍h tōa-hō͘.

⁹ Siōng-tè ah, lí lo̍h tōa-hō͘, hō͘ ta-sò ê thó͘-tōe tit-tio̍h lūn-te̍k,

¹⁰ hō͘ lí ê cho̍k-kûn tī hia khiā-khí. Siōng-tè ah, lí hō͘ sàn-chhiah-lâng tit-tio̍h un-hūi.

¹¹ Chú chhut bēng-lēng; chi̍t tōa-tīn hū-lú thoân hó siau-sit,

¹² “Kun-ông kap in ê kun-tūi lóng tô-cháu lah, tô-cháu lah!” Lâu tī chhù-lāi ê hū-lú mā pun-tio̍h chiàn-lī-phín.

¹³ Lín an-ún tó tī iûⁿ-tiâu lāi ê sî, chhin-chhiūⁿ hún-chiáu ê si̍t siuⁿ pe̍h-gûn, mn̂g siuⁿ n̂g-kim.

¹⁴ Choân-lêng-chiá tī kéng-lāi kóaⁿ-sòaⁿ lia̍t-ông ê sî, sè-bīn chhin-chhiūⁿ Sat-bûn-soaⁿ teh lo̍h-seh.

¹⁵ Pa-san-soaⁿ sī ke̍k-kî koân-tōa ê soaⁿ; Pa-san-soaⁿ sī ū chin chōe soaⁿ-niá ê soaⁿ.

¹⁶ Ū chin chōe soaⁿ-chiam ê soaⁿ ah, lín sī-án-chóaⁿ oàn-tò͘ teh khòaⁿ Siōng-tè só͘ ài khiā-khí ê soaⁿ? Siōng Chú ōe tiàm tī hia kàu éng-oán.

¹⁷ Siōng-tè ū chiàn-chhia chheng-chheng-bān-bān; Chú tùi Se-nāi chhut--lâi, lâi kàu I ê sèng-só͘.

¹⁸ Lí í-keng chiūⁿ kàu koân ê só͘-chāi, kā hu-ló͘ lia̍h--lâi; lí tùi lâng chiap-siū kòng-phín, sīm-chì chiap-siū pōe-poān ê lâng ê lé-mi̍h, hō͘ Chú Siōng-tè lí tī in tiong-kan khiā-khí.

¹⁹ Chú eng-kai siū chheng-chàn, I ji̍t-ji̍t pē lán ê tàⁿ; I chiū-sī kiù lán ê Siōng-tè.

²⁰ Lán ê Siōng-tè sī chín-kiù ê Siōng-tè; chí-ū Chú Siōng-tè ōe kiù lán thoat-lī sí-bông.

²¹ Chóng-sī Siōng-tè beh phah-phòa tùi-te̍k ê thâu-khak, chiū-sī kè-sio̍k hoān-chōe ê lâng ê thâu-khak.

²² Chú kóng, “Góa beh kā in tùi Pa-san chhōa--lâi, tùi hái siōng-chhim ê só͘-chāi chhōa tò-tńg--lâi,

²³ hō͘ lín tùi in ê huih tiong kiâⁿ--kè, hō͘ lín ê káu chī in ê huih.”

²⁴ Siōng-tè ah, lí sī góa ê Siōng-tè, góa ê Kun-ông. Lâng í-keng khòaⁿ-kìⁿ lí teh kiâⁿ, kiâⁿ-ji̍p sèng-só͘.

²⁵ Chhiùⁿ-koa--ê kiâⁿ tī thâu-chêng, chàu-ga̍k--ê tè tī āu-bīn, iô lin-long-kó͘ ê cha-bó͘ gín-á kiâⁿ tī tiong-kan.

²⁶ Tio̍h tī tāi-hōe tiong chheng-chàn Siōng-tè, chiū-sī Siōng Chú, Í-sek-lia̍t ê goân-thâu.

²⁷ Siōng-sòe ê Piān-ngá-bín chòe thâu teh chhōa, Iû-tāi kui-kûn ê cho̍k-tiúⁿ, Se-pò͘-lûn ê cho̍k-tiúⁿ, Ná-hut-tha-lī ê cho̍k-tiúⁿ tè tī āu-bīn.

²⁸ Siōng-tè ah, kiû lí hián-chhut khùi-la̍t; kiû lí hián-sī lí kā goán chòe ê sū.

²⁹ Ūi-tio̍h lí tī Iâ-lō͘-sat-léng ê tiān, lia̍t-ông beh tòa lé-mi̍h hiàn hō͘ lí.

³⁰ Kiû lí chek-pī Ai-ki̍p, i chhin-chhiūⁿ tī lô͘-úi tiong ê iá-siù; kiû lí chek-pī lia̍t-pang, in chhin-chhiūⁿ kui-kûn ê gû-káng kap gû-á. Kiû lí hō͘ tham-ài kòng-phín ê lâng khut-ho̍k tī lí kha-ē; kiû lí kóaⁿ-sòaⁿ hò͘ⁿ-chiàn ê lia̍t-pang.

³¹ Te̍k-sài beh tòa kòng-phín tùi Ai-ki̍p lâi; Kó͘-si̍t beh kóaⁿ-kín tùi Siōng-tè hiàn lé-mi̍h.

³² Sè-chiūⁿ ê lia̍t-kok ah, tio̍h tùi Siōng-tè chhiùⁿ-koa, gîm-si chheng-chàn Chú,

³³ chheng-chàn chē tī tùi kó͘-chá chiū ū, ke̍k-koân ê thiⁿ Hit-ūi. I hoat-chhut ke̍k-tōa ū-la̍t ê siaⁿ.

³⁴ Lín tio̍h chiong koân-lêng kui hō͘ Siōng-tè. I ê ui-giâm tī Í-sek-lia̍t ê téng-bīn; I ê koân-lêng hián-sī tī kiong-chhong.

³⁵ Siōng-tè ah, lí tī lí ê sèng-só͘ si̍t-chāi thang kèng-ùi; Í-sek-lia̍t ê Siōng-tè sù khùi-la̍t koân-lêng hō͘ I ê chú-bîn. Siōng-tè eng-kai siū chheng-chàn!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan