Si-phian 66 - 現代台語譯本羅馬字版

Chheng-chàn Siōng-tè ê Kiù-un
Chi̍t phiⁿ si-koa, kau hō͘ sèng-ga̍k-tiúⁿ.

¹ Choân-tōe lóng tio̍h tùi Siōng-tè chhut hoaⁿ-hí ê siaⁿ,

² chhiùⁿ-koa chheng-chàn I miâ ê êng-kng, ēng chàn-bí ê ōe hián-bêng I ê êng-kng.

³ Tio̍h tùi Siōng-tè kóng, “Lí ê chok-ûi jōa-ni̍h thang kiaⁿ-ùi! In-ūi lí ê tōa koân-lêng, lí ê tùi-te̍k ōe hâng-ho̍k lí.

⁴ Choân-tōe ōe kèng-pài lí, gîm-si chheng-chàn lí; ōe gîm-si o-ló lí ê miâ.”

⁵ Lâi, lâi khòaⁿ Siōng-tè ê chok-ûi; I tùi sè-kan-lâng ê só͘-chòe chin thang kiaⁿ-ùi.

⁶ I hō͘ hái pìⁿ-chòe ta-tōe, hō͘ I ê chú-bîn pō͘-kiâⁿ kè hô. Tī hia goán in-ūi I lâi hoaⁿ-hí.

⁷ I ēng I ê koân-lêng éng-oán thóng-tī; I ê ba̍k-chiu kàm-chhat lia̍t-pang; pōe-ge̍k ê lâng m̄-thang chū-ko.

⁸ Bān-bîn ah, tio̍h chheng-chàn goán ê Siōng-tè, hō͘ lâng thiaⁿ-tio̍h chheng-chàn I ê siaⁿ.

⁹ I pó-chûn goán ê sìⁿ-miā, hō͘ goán kian-kò͘ khiā-chāi.

¹⁰ Siōng-tè ah, lí ū chhì-giām goán, thoàn-liān goán chhin-chhiūⁿ thoàn-liān gûn.

¹¹ Lí hō͘ goán ji̍p lô-bāng, ēng tāng-tàⁿ teh tī goán sin-chiūⁿ.

¹² Lí iông-ún lâng sái-chhia kauh-kè goán ê thâu-khak; goán keng-kè chúi kap hé. Chóng-sī lí chhōa goán kàu khoan-khoah chū-iû ê só͘-chāi.

¹³ Góa beh tòa sio-hòa-chè chìn-ji̍p lí ê tiān; góa beh tùi lí siā góa ê goān.

¹⁴ Góa beh hêng tī hoān-lān ê sî chhùi-tûn só͘ kóng, chhùi só͘ hē ê goān.

¹⁵ Góa beh hiàn pûi ê cheng-siⁿ chòe sio-hòa-chè, hiàn mî-iûⁿ-káng, gû-káng, kap soaⁿ-iûⁿ-káng, chiong sio-hòa-chè ê phang-bī hiàn hō͘ lí.

¹⁶ Kèng-ùi Siōng-tè ê lâng lóng tio̍h lâi thiaⁿ; góa beh kóng-khí I ūi góa só͘ chòe ê sū.

¹⁷ Góa bat ēng góa ê chhùi kiû-kiò I, ēng góa ê chi̍h chheng-chàn I, chun-chông I.

¹⁸ Góa sim-lāi nā ū khǹg pháiⁿ ê liām-thâu, Chú it-tēng bōe thiaⁿ.

¹⁹ M̄-kú Siōng-tè si̍t-chāi ū thiaⁿ--kìⁿ; I í-keng àⁿ-lo̍h thiaⁿ góa kî-tó ê siaⁿ.

²⁰ Siōng-tè eng-kai siū chheng-chàn; I m̄-bat kū-choa̍t góa ê kî-tó, m̄-bat hō͘ I ê chû-ài lī-khui góa.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan