Si-phian 65 - 現代台語譯本羅馬字版

Chheng-chàn Siōng-tè ê Kiù-un
Tāi-pi̍t ê si, kau hō͘ sèng-ga̍k-tiúⁿ.

¹ Siōng-tè ah, lâng eng-kai tī Sek-an chheng-chàn lí, tùi lí siā só͘ hē ê goān.

² Thiaⁿ kî-tó ê Chú ah, choân jîn-lūi lóng beh chiū-kūn lí.

³ Chōe ap-tó góa; m̄-kú goán ê kè-sit lí lóng beh sià-bián.

⁴ Lí só͘ kéng-soán, hō͘ in chhin-kūn lí, tòa tī lí tiān ê tiâⁿ ê lâng chin ū hok-khì! Goán beh in-ūi lí ê chhù, lí ê sèng-tiān ê hok-khì sim-móa-ì-chiok!

⁵ Chín-kiù goán ê Siōng-tè ah, lí ēng thang kiaⁿ-ùi ê chok-ûi, si-hêng kong-gī lâi ìn-tap goán; tōe-ke̍k kap hái-bīn hn̄g-hn̄g ê lâng lóng beh óa-khò lí.

⁶ Lí chiong-hián lí ê koân-lêng, ēng khùi-la̍t hō͘ soaⁿ-niá an-ún khiā-chāi.

⁷ Hái iô-choah, hái-éng hōa-hōa-háu, bān-bîn háng-hoah, lí hō͘ in lóng pêng-chēng.

⁸ Khiā-khí tī tōe chīn-thâu ê lâng ōe in-ūi lí ê sîn-jiah kiaⁿ-ùi; ji̍t chhut ji̍t lo̍h ê só͘-chāi, lí hō͘ in hoan-ho͘.

⁹ Lí koàn-kò͘ thó͘-tōe, lo̍h-hō͘ koàn-ak, hō͘ thó͘-tōe chin pûi. Siōng-tè ê hô, chúi móa-móa; lí án-ni chún-pī thó͘-tōe, kiong-kip ngó͘-kok.

¹⁰ Lí koàn-ak chhân-hn̂g, hō͘ chúi móa kau móa lêng, hō͘ thô͘-bah nńg-nńg. Lí sù-hok hō͘ só͘ chai-chèng--ê lóng tōa-châng.

¹¹ Lí ēng hong-siu chòe nî-tang ê ông-koan; lí keng-kè ê lō͘ ū iû teh tih,

¹² liân khòng-iá ê chháu-po͘ to ū iû teh tih. Soaⁿ-thâu ēng hoaⁿ-hí chòe tòa hâ,

¹³ chháu-po͘ ū iûⁿ-kûn chòe saⁿ chhēng, soaⁿ-kok ū ngó͘-kok chòe gōa-thò moa; in lóng hoaⁿ-hí chhut-siaⁿ gîm-si.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan