Si-phian 62 - 現代台語譯本羅馬字版

Sìn-khò Siōng-tè
Tāi-pi̍t ê si, chiàu Iâ-tō͘-tùn ê choh-hoat, kau hō͘ sèng-ga̍k-tiúⁿ.

¹ Góa ê sim-sîn chēng-chēng, choan-sim thèng-hāu Siōng-tè; góa ê chín-kiù sī tùi I lâi.

² Chí-ū I sī pó-hō͘ góa ê chio̍h-pôaⁿ, góa ê chín-kiù; I sī góa ê pó-lúi, góa lóng bōe tōng-iâu.

³ Lín kong-kek chi̍t ê lâng beh kàu sím-mi̍h sî? Lín chhin-chhiūⁿ teh sak khi-chhiâ ê chhiûⁿ, beh-tó ê piah án-ni kā hit-ê lâng húi-hoāi.

⁴ Lín tàu-tīn kè-bô͘, it-ti̍t beh kā i tùi chun-kùi ê ūi chhia--lo̍h-khì; lín ài kóng pe̍h-chha̍t. Lín chhùi chiok-hok, sim chiù-chó͘.

⁵ Góa ê sim-sîn ah, tio̍h chēng-chēng, choan-sim thèng-hāu Siōng-tè, in-ūi góa ê ǹg-bāng tùi I lâi.

⁶ Chí-ū I sī góa ê chio̍h-pôaⁿ, góa ê chín-kiù; I sī góa ê pó-lúi, góa lóng bōe tōng-iâu.

⁷ Góa ê chín-kiù, góa ê kong-êng chāi-tī Siōng-tè; I sī góa ê tōa chio̍h-pôaⁿ, góa ê pī-lān-só͘.

⁸ Bān-bîn ah, tio̍h put-sî óa-khò I, tùi I thò͘-lō͘ lín ê sim-chêng. Siōng-tè sī lán ê pī-lān-só͘.

⁹ Lâng chin-chiàⁿ sī khang-hu, ōe-sí ê lâng lóng sī hu-ké, hē tī thian-phêng it-tēng phû--khí-lâi; in ha̍p--khí-lâi iáu pí ho͘-khip ê khùi khah khin.

¹⁰ M̄-thang khò pō-le̍k, m̄-thang khò chhiúⁿ-toa̍t; châi-pó ke-thiⁿ mā m̄-thang siūⁿ-beh khò i.

¹¹ Siōng-tè kóng chi̍t hāng, góa thiaⁿ-tio̍h nn̄g hāng: Koân-lêng sio̍k tī Siōng-tè,

¹² chû-ài mā sio̍k tī I. Chú ah, lí beh chiàu ta̍k-lâng ê só͘-chòe kā i pò-èng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan