Bìoball air-loidhne

Si-phian 59 - 現代台語譯本羅馬字版

Kî-kiû Siōng-tè Pó-iū
Sò-lô phài lâng khì Tāi-pi̍t ê chhù bâi-ho̍k beh thâi i ê sî, Tāi-pi̍t chòe chit-siú kim-si, kau hō͘ sèng-ga̍k-tiúⁿ; tiāu, ēng “M̄-thang Húi-hoāi”.

¹ Góa ê Siōng-tè ah, kiû lí kiù góa thoat-lī góa ê tùi-te̍k, kā góa an-tì tī koân ê só͘-chāi, hō͘ góa thoat-lī khí-lâi kong-kek góa ê lâng.

² Kiû lí kiù góa thoat-lī choh-pháiⁿ ê lâng, kiù góa thoat-lī ài hāi lâng sìⁿ-miā ê lâng.

³ In bâi-ho̍k beh hāi góa ê sìⁿ-miā; hiong-ok ê lâng chū-chi̍p lâi kong-kek góa, m̄-kú Siōng Chú ah, che m̄-sī in-ūi góa ê kè-sit á-sī chōe-kò.

⁴ Góa sui-jiân bô kè-sit, in chhiong-lâi beh hāi góa. Kín khí--lâi, khòaⁿ góa ê khùn-kéng lâi pang-chān góa!

⁵ Siōng Chú — Bān-kun ê Thóng-sòe Siōng-tè ah, kín khí-lâi chhú-hoa̍t te̍k-tùi lí ê lia̍t-pang! Í-sek-lia̍t ê Siōng-tè ah, m̄-thang khoan-sià só͘-ū kan-chà ê pháiⁿ-lâng.

⁶ In àm-sî tò--lâi, chhin-chhiūⁿ káu teh pūi, tī siâⁿ-lāi kiâⁿ-lâi-kiâⁿ-khì.

⁷ In ê chhùi thò͘-chhut ê ōe chhin-chhiūⁿ lāi ê to; in siūⁿ, “Kiám ū lâng teh thiaⁿ?”

⁸ M̄-kú Siōng Chú lí beh chhiò in; lí beh thí-chhiò lia̍t-pang.

⁹ Siōng-tè — góa ê khùi-la̍t ah, góa beh gióng-bōng lí, in-ūi lí sī góa ê pó-lúi.

¹⁰ Góa ê Siōng-tè ōe ēng chû-ài khoán-thāi góa; Siōng-tè ōe hō͘ góa khòaⁿ-kìⁿ tùi-te̍k siū pò-èng.

¹¹ M̄-thang châu-bia̍t in, chiah bián góa ê chú-bîn bōe-kì--tit. Chú — goán ê tún-pâi ah, kiû lí ēng lí ê khùi-la̍t hō͘ in sì-kòe liû-lōng koh sit-sè.

¹² In in-ūi chhùi hoān ê chōe kap chhùi-tûn kóng ê ōe, ōe poa̍h-lo̍h ka-kī ê kiau-ngō͘ só͘ siat ê hām-chíⁿ. In-ūi in só͘ kóng ê chiù-mē kap pe̍h-chha̍t,

¹³ kiû lí hoat siū-khì châu-bia̍t in, kā in thiat-tóe siau-bia̍t, hō͘ lâng lóng chai Siōng-tè teh chiáng-koán Í-sek-lia̍t, sīm-chì kàu thiⁿ-piⁿ-hái-kak.

¹⁴ In àm-sî tò--lâi, chhin-chhiūⁿ káu teh pūi, tī siâⁿ-lāi kiâⁿ-lâi-kiâⁿ-khì.

¹⁵ In cháu-lâi-cháu-khì chhē-chia̍h, chia̍h bô pá chiū kui-mî pūi bô-thêng.

¹⁶ M̄-kú góa beh chhiùⁿ-koa chheng-chàn lí ê khùi-la̍t, chá-khí-sî beh tōa-siaⁿ o-ló lí ê chû-ài; in-ūi lí sī góa ê pó-lúi, tī hoān-lān ê ji̍t chòe góa pī-lān ê só͘-chāi.

¹⁷ Siōng-tè — góa ê khùi-la̍t ah, góa beh chhiùⁿ-koa chheng-chàn lí, in-ūi lí sī góa ê pó-lúi, sī éng-oán thiàⁿ góa ê Siōng-tè.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan