Bìoball air-loidhne

Si-phian 58 - 現代台語譯本羅馬字版

Kiû Siōng-tè Hêng-hoa̍t Choh-pháiⁿ ê Lâng
Tāi-pi̍t ê kim-si, kau hō͘ sèng-ga̍k-tiúⁿ; tiāu, ēng “M̄-thang Húi-hoāi”.

¹ Chip-chèng-chiá, lín kiám ū chin-chiàⁿ teh kóng kong-gī? Kiám ū chiàu kong-pêng sím-phòaⁿ lâng?

² Bô, lín sim-lāi kè-ōe chòe pháiⁿ tāi-chì, tī tōe-chiūⁿ, lín ēng chhiú tùi lâng si kiông-pō.

³ Pháiⁿ-lâng tùi chhut bú-thai chiū kiâⁿ bê-lō͘; chi̍t-ē lī-khui lāu-bú ê pak-tó͘ chiū kiâⁿ phian-lō͘, kóng pe̍h-chha̍t.

⁴ In ê to̍k chhin-chhiūⁿ chôa ê to̍k; in chhin-chhiūⁿ to̍k-chôa that-ba̍t ka-kī ê hī-khang,

⁵ m̄ thiaⁿ lāng-chôa ê lâng, á-sī gâu liām-chiù ê lâng ê siaⁿ.

⁶ Siōng-tè ah, kiû lí phah-chi̍h in ê chhùi-khí; Siōng Chú ah, kiû lí kòng-tn̄g béng-sai ê tōa-ki gê-khí.

⁷ Goān in siau-sit chhin-chhiūⁿ chúi lâu-liáu-liáu, chhin-chhiūⁿ chháu siū thún-ta̍h ta--khì.

⁸ Goān in chhin-chhiūⁿ lō͘-lê sô--kè ê jiah liâm-piⁿ bô--khì; chhin-chhiūⁿ hū-jîn-lâng liû-sán ê thai bô kìⁿ-tio̍h thiⁿ-ji̍t.

⁹ Lín ēng chhì-á hiâⁿ-hé, tiáⁿ iáu-bē jia̍t, I beh ēng kńg-lê-á-hong, chiong tâm--ê kap ta--ê chòe-chi̍t-ē sàu--khì.

¹⁰ Gī-lâng khòaⁿ-kìⁿ in siū pò-èng chiū hoaⁿ-hí; i ēng pháiⁿ-lâng lâu ê huih sóe-kha.

¹¹ Lâng chiū kóng, gī-lâng chin-chiàⁿ ū hó-pò; tī tōe-bīn-chiūⁿ Siōng-tè kó-jiân ū teh sím-phòaⁿ.

The Bible Society in Taiwan

Lean sinn:

Ceanglaichean taic

Sanasan