Bìoball air-loidhne

Si-phian 56 - 現代台語譯本羅馬字版

Sìn-khò Siōng-tè ê Kî-tó
Tāi-pi̍t ê kim-si, tī Ka-te̍k hō͘ Hui-lī-sū-lâng lia̍h--tio̍h ê sî chòe--ê, kau hō͘ sèng-ga̍k-tiúⁿ; tiāu, ēng “Hn̄g-hn̄g Bô Siaⁿ ê Hún-chiáu”.

¹ Siōng-tè ah, kiû lí lîn-bín góa, in-ūi lâng thún-ta̍h góa, kui-ji̍t kong-kek ap-chè góa.

² Góa ê tùi-te̍k kui-ji̍t thún-ta̍h góa; Chì-koân ê Siōng-tè ah, kong-kek góa ê lâng chin chōe.

³ Góa kiaⁿ-hiâⁿ ê sî, góa beh óa-khò lí.

⁴ Góa óa-khò Siōng-tè, góa beh chheng-chàn I èng-ún ê ōe; óa-khò Siōng-tè, góa chiū bô kiaⁿ. Ōe-sí ê lâng ōe-tàng kā góa án-chóaⁿ?

⁵ In kui-ji̍t oai-khiok góa ê ōe, só͘ siūⁿ--ê lóng sī beh hāi góa.

⁶ In chū-chi̍p, bâi-ho̍k, teh siòng góa ê kha-pō͘, tng-tán beh hāi góa ê sìⁿ-miā.

⁷ In chòe pháiⁿ kiám ōe-tàng tô-thoat? Siōng-tè ah, kiû lí hoat siū-khì hō͘ chiah-ê tùi-te̍k khut-ho̍k.

⁸ Góa ê pi-siong, lí ū kì-lio̍k; kiû lí chiong góa ê ba̍k-sái siu tī lí ê phê-tē. Chiah-ê kiám bô lóng kì tī lí ê chheh?

⁹ Góa kiû-kiò ê sî, tùi-te̍k lóng ōe oa̍t-tńg-sin thè--khì; góa chai, Siōng-tè ūi góa.

¹⁰ Góa óa-khò Siōng-tè, góa beh chheng-chàn I èng-ún ê ōe; góa óa-khò Siōng Chú, góa beh o-ló I ê ōe.

¹¹ Góa óa-khò Siōng-tè, góa chiū bōe kiaⁿ; lâng ōe-tàng kā góa án-chóaⁿ?

¹² Siōng-tè ah, góa beh chiàu góa ǹg lí só͘ hē ê goān, tùi lí hiàn siā-un ê chè.

¹³ In-ūi lí ū kiù góa ê sìⁿ-miā thoat-lī sí-bông, pó-hō͘ góa ê kha bô poa̍h-tó, hō͘ góa tit-tio̍h oa̍h-miā ê kng ín-chhōa, kiâⁿ tī lí bīn-chêng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan