Bìoball air-loidhne

Si-phian 55 - 現代台語譯本羅馬字版

Siū Chhut-bōe ê Lâng ê Kî-tó
Tāi-pi̍t kà-sī ê si, kau hō͘ sèng-ga̍k-tiúⁿ; ēng hiân ê ga̍k-khì phōaⁿ-chàu.

¹ Siōng-tè ah, kiû lí àⁿ hī-khang thiaⁿ góa ê kî-tó, m̄-thang bih--khí-lâi, m̄ thiaⁿ góa ê khún-kiû.

² Kiû lí thiaⁿ góa, ìn góa; góa chhau-hoân ut-chut, sim put-an,

³ lóng sī in-ūi tùi-te̍k háng-hoah, pháiⁿ-lâng ap-chè; in chiong chōe-kò thia̍p khí-lâi teh góa; in hoat siū-khì khún-pek góa.

⁴ Góa ê sim kiáu-ká thòng-khó͘; sí-bông ê kiaⁿ-hiâⁿ lîm-kàu góa.

⁵ Kiaⁿ-hiâⁿ ngia̍uh-ngia̍uh-chhoah pau-ûi góa; khióng-pò͘ khàm-ba̍t góa.

⁶ Góa kóng, “Góa chin ài chhin-chhiūⁿ hún-chiáu ū si̍t, thang pe-khì chhē-tio̍h an-hioh ê só͘-chāi.

⁷ Góa beh pe-khì hn̄g-hn̄g, hioh tī khòng-iá,

⁸ kín kàu pī-lān ê só͘-chāi, thang thoat-lī kông-hong-pō-ú.”

⁹ Chú ah, kiû lí phah-loān in ê gú-giân, hō͘ in ê ōe hūn-loān; in-ūi góa khòaⁿ-tio̍h siâⁿ-lāi ū kiông-pō hun-cheng,

¹⁰ pháiⁿ-lâng mî-ji̍t tī siâⁿ-chhiûⁿ téng kiâⁿ-se̍h, siâⁿ-lāi chhiong-móa chai-lān siâ-ok.

¹¹ Siâⁿ-lāi tò-chhù ū phò-hoāi; koe-lō͘ ta̍k-ūi ū ap-chè kap kan-chà.

¹² Bú-jio̍k góa--ê m̄-sī tùi-te̍k, nā sī, góa mā iáu ōe-tàng iông-jím. Chū-ko khòaⁿ-khin góa--ê m̄-sī oàn-hūn góa ê lâng, nā sī, góa mā iáu ōe-tàng siám-khui.

¹³ Bô phah-sǹg sī lí, kap góa kâng sin-hūn ê lâng, sī góa ê tâng-phōaⁿ, góa ti-kí ê pêng-iú.

¹⁴ Lán í-chêng siông-siông hō͘-siōng chhin-bi̍t tâm-lūn, kap chèng-lâng tī Siōng-tè ê tiān chòe-hé kèng-pài.

¹⁵ Goān sí-bông hut-jiân lîm-kàu in, hō͘ in oa̍h-oa̍h lo̍h Im-hú; in-ūi in khiā-khí ê só͘-chāi chhiong-móa siâ-ok.

¹⁶ Góa leh, góa beh kiû-kiò Siōng-tè; Siōng Chú ōe kiù góa.

¹⁷ Ē-hng, chá-khí, tiong-tàu, góa ai-siong thó͘-khùi; I lóng ōe thiaⁿ góa ê siaⁿ.

¹⁸ Sui-jiân hoán-tùi góa ê lâng chin chōe, I ōe kiù-sio̍k góa ê sìⁿ-miā thoat-lī kong-kek góa ê lâng, hō͘ góa pêng-an tò-tńg--lâi.

¹⁹ Tùi kó͘-chá éng-oán chûn-chāi ê Siōng-tè ōe thiaⁿ--kìⁿ, mā ōe kā in pò-èng; in-ūi in m̄ kái-piàn, bô beh kèng-ùi Siōng-tè.

²⁰ In chhun-chhiú kong-kek ka-kī ê tâng-phōaⁿ, ûi-pōe kap in li̍p ê iok.

²¹ In ê chhùi chhin-chhiūⁿ iû ku̍t-liu-liu; in ê sim chhàng oàn-hūn; in ê ōe pí iû khah jiû-nńg, kî-si̍t sī pu̍ih--chhut-lâi ê to.

²² Tio̍h chiong lí ê tàⁿ sià hō͘ Siōng Chú; I ōe hû-chhî lí, choa̍t-tùi bōe hō͘ gī-lâng sit-pāi.

²³ Thâi-sí lâng--ê kap kan-chà ê lâng bōe oa̍h kàu tiong-liân; Siōng-tè ah, lí ōe hō͘ in hām-lo̍h tī sí-bông ê Chhim-khiⁿ. Nā-sī góa, góa beh óa-khò lí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan