Si-phian 50 - 現代台語譯本羅馬字版

Chin-sêng ê Kèng-pài
A-sat ê si.

¹ Siōng Chú — Choân-lêng ê Siōng-tè tùi tang kàu sai chhut-siaⁿ, ho͘-tiàu choân-tōe.

² Tùi súi bô-pí ê Sek-an, Siōng-tè hoat-chhut kng.

³ Lán ê Siōng-tè lâi-lîm, it-tēng bōe chēng-chēng; ū iām-hé tī I bīn-chêng teh to̍h, ū pō-hong tī I sì-ûi teh sàu.

⁴ Ūi-tio̍h beh sím-phòaⁿ I ê chú-bîn, I tiàu thiⁿ kap tōe lâi choh-chèng.

⁵ I kóng, “Tio̍h tiàu-chi̍p góa sèng ê chú-bîn lâi góa chia, chiū-sī ēng chè-sū kap góa li̍p-iok ê lâng.”

⁶ Thiⁿ beh hián-bêng I ê kong-gī; in-ūi Siōng-tè pún-sin sī Sím-phòaⁿ-chiá.

⁷ “Góa ê chú-bîn ah, tio̍h thiaⁿ, góa beh kóng; Í-sek-lia̍t ah, góa beh khòng-kò lí. Góa sī Siōng-tè, lí ê Siōng-tè.

⁸ Góa bô in-ūi lí ê chè-sū chek-pī lí; lí ê sio-hòa-chè sî-siông tī góa ê bīn-chêng.

⁹ Góa m̄-bián tùi lí ê gû-tiâu chiap-siū kang ê gû, mā m̄-bián tùi lí ê iûⁿ-tiâu chiap-siū kang ê soaⁿ-iûⁿ.

¹⁰ In-ūi chhiū-nâ lāi ê pah-siù, chèng-soaⁿ ê cheng-siⁿ lóng sio̍k góa.

¹¹ Soaⁿ-lāi ê pe-chiáu, góa lóng bat; khòng-iá ê cháu-siù mā lóng sio̍k góa.

¹² “Góa nā iau, mā bōe kā lí kóng; in-ūi sè-kài kap bān-mi̍h lóng sio̍k góa.

¹³ Góa kiám ōe chia̍h gû-káng ê bah, lim soaⁿ-iûⁿ-káng ê huih?

¹⁴ Lí tio̍h ēng kám-siā chòe chè hiàn hō͘ Siōng-tè; tio̍h tùi Chì-koân-chiá siā-goān.

¹⁵ Tī hoān-lān ê ji̍t, lí tio̍h kiû-kiò góa; góa beh kiù lí, lí mā tio̍h chun-chông góa.”

¹⁶ M̄-kú Siōng-tè tùi pháiⁿ-lâng kóng, “Lí ná ū koân liām góa ê kui-lē, chhùi kóng góa ê iok?

¹⁷ Kî-si̍t lí iàm-ò͘ⁿ kà-sī, chiong góa ê ōe tàn tī ka-chiah-āu.

¹⁸ Lí kìⁿ-tio̍h chha̍t chiū kap i tâng-sim, kap kiâⁿ kan-îm ê lâng tàu-tīn.

¹⁹ “Lí ê chhùi kóng pháiⁿ-ōe; lí ê chi̍h chè-chō kan-chà.

²⁰ Lí sûi-piān kóng hiaⁿ-tī ê sī-hui, bû-lōa lí ê chhin-lâng.

²¹ Lí chòe chiah-ê tāi-chì, góa tiām-tiām bô chhut-siaⁿ, lí soah siūⁿ-kóng góa kap lí kâng-khoán. M̄-kú góa beh chek-pī lí, chiong chiah-ê tāi-chì pâi tī lí ê ba̍k-chiu chêng.

²² “Lín chiah-ê bōe-kì-tit Siōng-tè ê lâng ah, tio̍h siūⁿ chit-ê sū, chiah bián góa chiong lín thiah-chhùi, bô lâng thang kiù lín.

²³ Só͘-ū ēng kám-siā hiàn-chè ê lâng sī teh chun-chông góa; kiâⁿ chiàⁿ-lō͘ ê lâng, góa beh hō͘ i tit-tio̍h Siōng-tè ê chín-kiù.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan