Si-phian 5 - 現代台語譯本羅馬字版

Kî-kiû Pó-hō͘ ê Chá-tó
Tāi-pi̍t ê si, kau hō͘ sèng-ga̍k-tiúⁿ; ēng pûn ê ga̍k-khì phōaⁿ-chàu.

¹ Siōng Chú ah, kiû lí thiaⁿ góa kóng, chai góa ê khó͘-chêng.

² Góa ê Ông, góa ê Siōng-tè ah, kiû lí thiaⁿ góa kiû-kiò ê siaⁿ, in-ūi góa tùi lí kî-tó.

³ Siōng Chú ah, chá-khí-sî kiû lí thiaⁿ góa ê siaⁿ; chá-khí-sî góa tùi lí khún-kiû, koh thèng-hāu.

⁴ In-ūi lí m̄-sī ì-ài chōe-ok ê Siōng-tè; siâ-ok, lí bōe iông-ún.

⁵ Kiau-ngō͘ ê lâng bōe-tàng khiā tī lí bīn-chêng; chòe pháiⁿ ê lâng lóng sī lí só͘ oàn-hūn.

⁶ Kóng pe̍h-chha̍t--ê, lí beh bia̍t in; thâi-lâng kap kan-chà--ê, lóng sī Siōng Chú só͘ iàm-ò͘ⁿ.

⁷ M̄-kú in-ūi lí hong-sēng ê chû-ài, góa ōe-tàng ji̍p lí ê tiān, sim chûn kèng-ùi, tī lí ê sèng-tiān kèng-pài.

⁸ Siōng Chú ah, tùi-te̍k teh tng-tán góa, kiû lí chiàu lí ê kong-gī, chhōa góa kiâⁿ chèng-ti̍t ê lō͘.

⁹ In ê chhùi bô láu-si̍t, in ê sim ok-to̍k móa-móa, in ê nâ-âu sī khui-khui ê bōng, in ê chi̍h gâu phô͘-tháⁿ.

¹⁰ Siōng-tè ah, kiû lí tēng in ê chōe, hō͘ in hām-lo̍h ka-kī ê kè-bô͘; in-ūi in pōe-poān lí, chōe-kò chin tāng, kiû lí kā in kóaⁿ-chhut.

¹¹ Só͘-ū chhē lí chòe pī-lān-só͘--ê, kiû lí hō͘ in hoaⁿ-hí, hō͘ in hoaⁿ-hí chhut-siaⁿ bô-thêng, in-ūi lí pì-iū in. Goān hiah-ê ì-ài lí ê miâ ê lâng lóng in-ūi lí hoaⁿ-hí khoài-lo̍k.

¹² Siōng Chú ah, lí beh sù-hok hō͘ gī-lâng; lí beh ēng un-hūi, chhin-chhiūⁿ tún-pâi sì-bīn ûi in.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan