Si-phian 49 - 現代台語譯本羅馬字版

Óa-khò Châi-hù Sī Gû-gōng
Khó-la hō͘-tāi ê si, kau hō͘ sèng-ga̍k-tiúⁿ.

¹ Bān-bîn ah, lóng tio̍h thiaⁿ; sè-chiūⁿ lóng-chóng ê chū-bîn ah, tio̍h àⁿ hī-khang thiaⁿ.

² Bô-lūn pi-chiān chun-kùi, hó-gia̍h sàn-chhiah, lóng tio̍h thiaⁿ.

³ Góa ê chhùi beh kóng tì-hūi ê ōe; góa ê sim beh siūⁿ bêng-lí ê sū.

⁴ Góa beh àⁿ hī-khang thiaⁿ phì-jū, tôaⁿ-khîm kóe-seh ò-pì.

⁵ Pháiⁿ-lâng ēng khúi-chà pau-ûi góa, tī hoān-lān ê ji̍t, góa mā m̄ kiaⁿ.

⁶ In óa-khò châi-hù, khoa-kháu hó-gia̍h;

⁷ in bô chi̍t ê ū hoat-tō͘ sio̍k-hôe ka-kī, mā bōe-tàng ēng chîⁿ tùi Siōng-tè sio̍k-hôe sìⁿ-miā.

⁸ In-ūi sio̍k-hôe sìⁿ-miā ê kè-chîⁿ siuⁿ kùi, éng-oán hù bōe khí;

⁹ lâng bōe-tàng kú-tn̂g oa̍h--teh, bián siū húi-bia̍t.

¹⁰ Ū lâng khòaⁿ-tio̍h tì-hūi ê lâng sí, gû-gōng bû-ti ê lâng mā lóng bia̍t-bông, chîⁿ-châi lóng lâu hō͘ pa̍t-lâng.

¹¹ In siūⁿ-kóng in ê chhù ōe éng-oán lâu--teh, in khiā-khí ê só͘-chāi ōe sòa kàu bān-tāi, só͘-í ēng ka-kī ê miâ hō ka-kī ê tōe.

¹² M̄-kú lâng bōe-tàng kú-tn̂g hióng-siū hù-kùi, ōe chhin-chhiūⁿ cheng-siⁿ sí--khì.

¹³ Che sī óa-khò ka-kī ê lâng só͘ kiâⁿ ê lō͘, sī chàn-tông in ê ōe ê lâng ê kiat-kio̍k.

¹⁴ Chhin-chhiūⁿ chù-tiāⁿ lo̍h Im-hú ê iûⁿ, Sí-bông chòe in ê bo̍k-chiá chhōa in chi̍t-lō͘ kàu hûn-bōng; in ê seng-khu tī Im-hú siau-bia̍t, bô koh ū khiā-khí ê só͘-chāi.

¹⁵ M̄-kú Siōng-tè ōe sio̍k-hôe góa thoat-lī Im-hú ê koân-sè; in-ūi I ōe chiap-la̍p góa.

¹⁶ Lâng hoat-châi, ka-têng ke-thiⁿ kong-chhái; lí m̄-bián in-ūi án-ni tio̍h-kiaⁿ.

¹⁷ In-ūi i sí ê sî, bô chi̍t hāng tòa ōe khì; i ê êng-hôa bōe tè i khì.

¹⁸ Sui-jiân i chāi-siⁿ ka-kī khoa-iāu ū hok-khì, sêng-kong tit-tio̍h lâng ê o-ló,

¹⁹ i chòe-āu mā tio̍h khì kìⁿ in chó͘-kong, éng-oán bōe koh khòaⁿ-kìⁿ kng.

²⁰ Lâng bōe-tàng kú-tn̂g hióng-siū hù-kùi, i ōe chhin-chhiūⁿ cheng-siⁿ sí--khì.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan