Si-phian 48 - 現代台語譯本羅馬字版

Sek-an — Siōng-tè ê Siâⁿ
Khó-la hō͘-tāi ê si-koa.

¹ Siōng Chú chì-tōa, tī lán Siōng-tè ê siâⁿ, tī I sèng ê soaⁿ, eng-kai tōa-tōa siū chheng-chàn.

² Sek-an-soaⁿ tī pak-bīn, koân koh hó-khòaⁿ, choân-tōe só͘ hoaⁿ-hí, tōa Kun-ông ê siâⁿ.

³ Siōng-tè tī siâⁿ ê iàu-sài teh kò͘-siú, hō͘ lâng chai I sī pī-lān-só͘.

⁴ Khòaⁿ ah, lia̍t-ông chū-chi̍p, tàu-tīn chìn-kun beh kong-siâⁿ.

⁵ In chi̍t-ē khòaⁿ-tio̍h chit-ê siâⁿ chiū gông-ngia̍h, kiaⁿ-hiâⁿ, kóaⁿ-kín tô-cháu.

⁶ In tī hia ngia̍uh-ngia̍uh-chhoah, chhin-chhiūⁿ chhui-chūn ê hū-jîn-lâng thàng-thiàⁿ,

⁷ chhin-chhiūⁿ Tha-si ê chûn hō͘ tang-hong phah-phòa.

⁸ Tī Siōng Chú — Bān-kun ê Thóng-sòe ê siâⁿ-lāi, tī lán Siōng-tè ê siâⁿ-tiong, lán bat thiaⁿ--tio̍h, hiān-chāi chhin-ba̍k khòaⁿ--tio̍h, Siōng-tè beh kò͘-siú chit-ê siâⁿ kàu éng-oán.

⁹ Siōng-tè ah, tī lí ê tiān-lāi, goán siàu-liām lí ê chû-ài.

¹⁰ Siōng-tè ah, lí ê miâ thoân kàu choân-tōe, o-ló ê siaⁿ thàu kàu thiⁿ-piⁿ-hái-kak. Lí ê thóng-tī chhiong-móa kong-gī,

¹¹ lí ê phòaⁿ-toàn chèng-khak, Sek-an-soaⁿ tio̍h hoaⁿ-hí, Iû-tāi ê siâⁿ-chhī tio̍h khoài-lo̍k.

¹² Lín tio̍h se̍h Sek-an, chiu-ûi se̍h chi̍t lìn, tiám-sǹg siâⁿ-thah,

¹³ koan-chhat siâⁿ-chhiûⁿ, him-sióng pó-lúi, thang hō͘ lín tùi hō͘-tāi soan-kò:

¹⁴ Chit-ūi Siōng-tè sī lán éng-éng-oán-oán ê Siōng-tè, I ōe éng-oán ín-chhōa lán.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan