Si-phian 46 - 現代台語譯本羅馬字版

Siōng-tè kap Lán Tông-chāi
Khó-la hō͘-tāi ê si, kau hō͘ sèng-ga̍k-tiúⁿ; tiāu, ēng “Siàu-lú”.

¹ Siōng-tè sī lán ê pī-lān-só͘, lán ê khùi-la̍t, sī hoān-lān tiong ki̍p-sî ê pang-chān.

² Sui-jiân tōe tōa piàn-tōng, soaⁿ sóa kàu hái-tiong,

³ hái-chúi giâ-éng hōa-hōa-háu, soaⁿ in-ūi hái-tiòng iô-choah, lán lóng bián kiaⁿ.

⁴ Ū chi̍t tiâu hô, i ê chúi-liû hō͘ Siōng-tè ê siâⁿ hoaⁿ-hí; chiū-sī Chì-koân Siōng-tè khiā-khí sèng ê só͘-chāi.

⁵ Siōng-tè tiàm tī hia, siâⁿ it-tēng bōe iô-tāng; thiⁿ phú-kng, Siōng-tè chiū pang-chān i.

⁶ Lia̍t-pang hōa-hōa-háu, lia̍t-kok tōng-iâu; Siōng-tè chhut-siaⁿ, tōe chiū siau-iûⁿ.

⁷ Siōng Chú — Bān-kun ê Thóng-sòe kap lán tông-chāi; Ngá-kok ê Siōng-tè chòe lán ê iàu-sài.

⁸ Lâi, lâi khòaⁿ Siōng Chú ê só͘-chòe, khòaⁿ I tī tōe-chiūⁿ kî-biāu ê chok-ûi.

⁹ I at-chi̍h keng, chām-tn̄g chhiuⁿ, pàng-hé sio chiàn-chhia; I hō͘ chiàn-cheng lóng soah, choân-tōe hô-pêng.

¹⁰ I kóng, “Lóng chēng-chēng! Tio̍h chai góa sī Siōng-tè! Góa tī lia̍t-pang siū chun-chông, tī choân-tōe siū chun chòe tōa.”

¹¹ Siōng Chú — Bān-kun ê Thóng-sòe kap lán tông-chāi; Ngá-kok ê Siōng-tè chòe lán ê iàu-sài.

The Bible Society in Taiwan

Lean sinn:

Ceanglaichean taic

Sanasan