Bìoball air-loidhne

Si-phian 45 - 現代台語譯本羅馬字版

Siōng-chàn Kun-ông Hun-lé ê Si
Khó-la hō͘-tāi kà-sī ê si, sī ài-chêng ê koa, kau hō͘ sèng-ga̍k-tiúⁿ; tiāu, ēng “Pek-ha̍p-hoe”.

¹ Góa ê sim chhèng-chhut bí-hó ê ōe; góa beh chhiùⁿ ūi-tio̍h ông chòe ê si, góa ê chi̍h chhin-chhiūⁿ chok-ka láu-liān ê pit.

² Lí pí só͘-ū ê ta-po͘-lâng khah phiau-phiat, lí kóng ê ōe chin iu-ngá; só͘-í Siōng-tè sù-hok lí, ti̍t-kàu éng-oán.

³ Tōa koân-lêng ê ông, io tio̍h hâ kiàm, hián-sī lí ê êng-kng kap ui-giâm.

⁴ Ūi-tio̍h chin-lí, khiam-pi, kong-gī, lí ui-giâm khiâ-bé chìn-chêng, pek-chiàn-pek-sèng; lí ê chiàⁿ-chhiú chòe thang kiaⁿ-ùi ê sū.

⁵ Lí ê chìⁿ chin lāi, siā-thàng ông tùi-te̍k ê sim, hō͘ in lóng tó tī lí kha-ē.

⁶ Lí ê pó-chō sī Siōng-tè só͘ sù, sòa kàu éng-éng-oán-oán; lí ê kok ê koân-pèng sī chèng-ti̍t ê koân-pèng.

⁷ Lí ì-ài kong-gī, iàm-ò͘ⁿ put-hoat. Só͘-í Siōng-tè — lí ê Siōng-tè ēng hoaⁿ-hí ê iû boah lí, chhiau-kè boah lí ê tâng-phōaⁿ.

⁸ Lí ê i-ho̍k ū bu̍t-io̍h, tîm-hiuⁿ, jio̍k-kùi ê phang-bī; tùi chhiūⁿ-gê ê ông-kiong ū hiân-ga̍k hō͘ lí hoaⁿ-hí.

⁹ Lí ông-hui ê tiong-kan ū lia̍t-kok ê kong-chú; ông-hō͘ ēng siōng-sûn ê kim chng-thāⁿ, khiā tī lí chiàⁿ-pêng.

¹⁰ Cha-bó͘ gín-á ah, tio̍h chim-chiok thiaⁿ, siông-sè siūⁿ; tio̍h bōe-kì-tit lí ê peh-sìⁿ kap lí lāu-pē ê ke.

¹¹ Ông ōe loân-bō͘ lí ê súi; i sī lí ê chú, lí tio̍h sūn-ho̍k.

¹² Thài-ní ê jîn-bîn ōe lâi sàng lé-mi̍h; peh-sìⁿ tiong ê hó-gia̍h-lâng ōe lâi tùi lí kiû un-chêng.

¹³ Ông ê sin-niû tī kiong-lāi hui-siông êng-hôa; i chhēng kim-sòaⁿ siù ê lé-ho̍k.

¹⁴ I chhēng siù-hoe ê lé-ho̍k hō͘ lâng chhōa kàu ông bīn-chêng; phōaⁿ-kè ê chāi-sek-lú tè tī āu-bīn mā lâi kàu lí bīn-chêng.

¹⁵ In hoaⁿ-hí khoài-lo̍k, hō͘ lâng chhōa-ji̍p ông-kiong.

¹⁶ Lí ê kiáⁿ-sun ōe sòa-chiap lí ê lia̍t-chó͘; lí beh siat-li̍p in tī choân-tōe chòe ông.

¹⁷ Góa beh hō͘ lí ê miâ tāi-tāi siū kì-liām; bān-bîn ōe éng-éng-oán-oán chheng-chàn lí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan