Bìoball air-loidhne

Si-phian 44 - 現代台語譯本羅馬字版

Kî-kiû Pó-hō͘
Khó-la hō͘-tāi kà-sī ê si, kau hō͘ sèng-ga̍k-tiúⁿ.

¹ Siōng-tè ah, lí tī kó͘-chá, goán ê chó͘-sian ê sî só͘ chòe ê tāi-chì, goán ū chhin-hī thiaⁿ--kìⁿ; goán ê lia̍t-chó͘ ū tùi goán kóng-khí:

² Lí ū ēng lí ê chhiú kóaⁿ-cháu lia̍t-pang lâi chai-pôe goán ê chó͘-sian, ū kàng chai-hō hō͘ hiah-ê bîn-cho̍k lâi hō͘ goán ê lia̍t-chó͘ hoat-tián.

³ In m̄-sī khò ka-kī ê to-kiàm tit-tio̍h thó͘-tōe, mā m̄-sī ēng chhiú-kut kiù ka-kī; sī lí ê chiàⁿ-chhiú, lí ê chhiú-kut, lí ê bīn ê kng kiù in; in-ūi lí ì-ài in.

⁴ Siōng-tè ah, lí sī góa ê Ông; kiû lí chhut bēng-lēng chín-kiù Ngá-kok.

⁵ Goán khò lí chhia-tó goán ê tùi-te̍k, khò lí ê miâ thún-ta̍h kong-kek goán ê lâng.

⁶ Góa bô óa-khò góa ê keng; góa ê to mā bōe kiù góa.

⁷ Lí ū kiù goán thoat-lī tùi-te̍k, hō͘ oàn-hūn goán ê lâng sit-pāi kiàn-siàu.

⁸ Goán beh kui-ji̍t khoa-kháu Siōng-tè, beh éng-oán chheng-chàn lí ê miâ.

⁹ M̄-kú hiān-chāi lí pàng-sak goán, hō͘ goán siū lêng-jio̍k; lí bô kap goán ê kun-peng tàu-tīn chhut-chiàn.

¹⁰ Lí hō͘ goán tī tùi-te̍k ê bīn-chêng oa̍t-thâu tô-cháu, chhut-chāi oàn-hūn goán ê lâng chhiúⁿ-toa̍t.

¹¹ Lí hō͘ goán chhin-chhiūⁿ iûⁿ hō͘ lâng thun-chia̍h; lí kā goán kóaⁿ-sòaⁿ khì lia̍t-pang.

¹² Lí kā lí ê chú-bîn sio̍k-sio̍k-á bōe, lí kiám ū tit-tio̍h sím-mi̍h lī-ek?

¹³ Lí hō͘ goán siū keh-piah kok lêng-jio̍k, hō͘ sì-ûi ê lâng thí-chhiò ki-chhì.

¹⁴ Lí hō͘ goán tī lia̍t-pang tiong chòe chhiò-khe, hō͘ in tùi goán hàiⁿ-thâu.

^15-16 In-ūi lóe-mē, húi-pòng ê lâng ê siaⁿ, in-ūi tùi-te̍k kap pò-oan ê lâng ê iân-kò͘, goán kui-ji̍t siū lêng-jio̍k, móa-bīn kiàn-siàu.

¹⁷ Chiah-ê lóng lîm-kàu goán, goán iáu bô bōe-kì-tit lí, mā bô ûi-hoán lí ê iok.

¹⁸ Goán ê sim bô ûi-pōe lí; goán ê kha-pō͘ bô phian-lī lí ê lō͘.

¹⁹ Lí kèng-jiân kā goán phah-tó tī chhâi-lông chhut-ji̍p ê só͘-chāi, ēng sí ê ìm-ńg tà goán.

²⁰ Goán nā bōe-kì-tit goán ê Siōng-tè ê miâ, chhun-chhiú hoan-gêng pa̍t-ê sîn-bêng,

²¹ Siōng-tè kiám khòaⁿ bōe chhut? I it-tēng chai lâng sim-lāi ê pì-bi̍t.

²² Goán in-ūi lí ê iân-kò͘ kui-ji̍t siū sat-hāi; lâng khòaⁿ goán chhin-chhiūⁿ beh hō͘ lâng thâi ê iûⁿ.

²³ Chú ah, lí tio̍h cheng-sîn, ná iáu-teh khùn? Kiû lí khí--lâi, m̄-thang éng-oán pàng-sak goán.

²⁴ Lí sī-án-chóaⁿ oa̍t-thâu m̄ chhap goán? Sī-án-chóaⁿ bōe-kì-tit goán só͘ siū ê ap-chè kap khó͘-lān?

²⁵ Goán í-keng phak tī thô͘-hún, pak-tó͘ tah tī thô͘-kha.

²⁶ Kiû lí khí-lâi pang-chān goán, in-ūi lí ê chû-ài, kiû lí kiù-sio̍k goán.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan