Bìoball air-loidhne

Si-phian 42 - 現代台語譯本羅馬字版

TĒ-JĪ KOÀN (42-72 phiⁿ) Liû-bông-chiá ê Kî-tó
Khó-la hō͘-tāi kà-sī ê si, kau hō͘ sèng-ga̍k-tiúⁿ.

¹ Siōng-tè ah, góa ê sim pek-chhiat him-bō͘ lí, chhin-chhiūⁿ lo̍k pek-chhiat him-bō͘ khoe-chúi.

² Góa ê sim chhùi-ta him-bō͘ Siōng-tè, éng-oa̍h ê Siōng-tè; góa sím-mi̍h sî ōe-tàng kàu Siōng-tè bīn-chêng khì tiâu-kìⁿ?

³ Góa mî-ji̍t ēng ba̍k-sái chún pn̄g thun; góa ê tùi-te̍k it-ti̍t mn̄g góa, “Lí ê Siōng-tè tī tó-ūi?”

⁴ Góa chá-chêng chhōa chèng-lâng chòe-tīn khì Siōng-tè ê chhù, ēng hoaⁿ-hí chheng-chàn ê siaⁿ tāi-ke siú-choeh. Góa tui-liām chiah-ê tāi-chì, sim hui-siông pi-siong.

⁵ Góa ê sim ah, lí sī-án-chóaⁿ ut-chut, sī-án-chóaⁿ tī góa lāi-bīn haiⁿ-haiⁿ-chhan? Tio̍h gióng-bōng Siōng-tè; góa iáu-kú beh chheng-chàn I, in-ūi I sī góa ê Chín-kiù-chiá, góa ê Siōng-tè.

⁶ Góa ê sim tī góa lāi-bīn ut-chut, só͘-í góa beh tùi Iok-tàn ê tōe, Hek-bûn, Bí-sat ê soaⁿ siàu-liām lí.

⁷ Lí ê pho̍k-pò͘ chhut-siaⁿ, chhim-ian kap chhim-ian saⁿ ho͘-èng; lí ê pho-lōng, lí ê tōa-éng im-ba̍t góa.

⁸ Ji̍t--sî, Siōng Chú si-lo̍h I ê chû-ài; mî--sî, I hō͘ góa chhiùⁿ-koa, tùi sù góa oa̍h-miā ê Siōng-tè kî-kiû.

⁹ Góa beh tùi Siōng-tè — góa ê chio̍h-pôaⁿ kóng, “Lí sī-án-chóaⁿ bōe-kì-tit góa? Góa sī-án-chóaⁿ tio̍h in-ūi tùi-te̍k ê ap-pek pi-siong kiâⁿ-lâi-kiâⁿ-khì?”

¹⁰ Góa ê tùi-te̍k khi-hū góa, phah-chhùi góa ê kut-thâu; in it-ti̍t mn̄g góa, “Lí ê Siōng-tè tī tó-ūi?”

¹¹ Góa ê sim ah, lí sī-án-chóaⁿ ut-chut, sī-án-chóaⁿ tī góa lāi-bīn haiⁿ-haiⁿ-chhan? Tio̍h gióng-bōng Siōng-tè; góa iáu-kú beh chheng-chàn I, in-ūi I sī góa ê Chín-kiù-chiá, góa ê Siōng-tè.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan