Bìoball air-loidhne

Si-phian 41 - 現代台語譯本羅馬字版

Phòa-pīⁿ ê Sî ê Kî-tó
Tāi-pi̍t ê si, kau hō͘ sèng-ga̍k-tiúⁿ.

¹ Khòaⁿ-kò͘ sàn-chhiah-lâng ê lâng chin ū hok-khì! Tī hoān-lān ê ji̍t, Siōng Chú ōe kiù i.

² Siōng Chú ōe pó-siú i ê sìⁿ-miā, hō͘ i tī tōe-chiūⁿ hióng-hok, bōe chiàu tùi-te̍k ê sim-goān chiong i kau hō͘ in.

³ I tó tī pīⁿ-chhn̂g, Siōng Chú ōe hû-chhî i; i phòa-pīⁿ ê sî, Siōng Chú ōe hō͘ i koh peh--khí-lâi.

⁴ Góa bat kóng, “Siōng Chú ah, góa ū tek-chōe lí, kiû lí lîn-bín góa, i-tī góa.”

⁵ Góa ê tùi-te̍k ēng pháiⁿ-ōe gī-lūn góa, kóng, “I tī-sî ōe sí, i ê miâ tī-sî ōe siau-sit?”

⁶ In lâi khòaⁿ góa lóng kóng pe̍h-chha̍t-ōe; in sim chûn kan-ok, chi̍t-ē chhut--khì chiū sì-kòe kā lâng kóng.

⁷ Só͘-ū oàn-hūn góa ê lâng chhi-bú-chhi-chhū gī-lūn góa; in siat kè-bô͘ beh hāi góa.

⁸ In kóng, “I ê seng-khu ū tì-tio̍h choa̍t-chèng, í-keng tó-chhn̂g bōe koh khí--lâi.”

⁹ Góa só͘ sìn-jīm, chia̍h góa ê pn̄g, ti-kí ê pêng-iú, kèng-jiân gia̍h kha that góa.

¹⁰ Siōng Chú ah, kiû lí lîn-bín góa, hō͘ góa koh peh khí-lâi pò-ho̍k in.

¹¹ Góa ê tùi-te̍k bōe iâⁿ góa, góa chiū chai lí ì-ài góa.

¹² In-ūi góa sûn-choân chèng-ti̍t, lí ōe hû-chhî góa, hō͘ góa éng-oán khiā tī lí ê bīn-chêng.

¹³ Goān chheng-chàn kui hō͘ Siōng Chú — Í-sek-lia̍t ê Siōng-tè, tùi éng-oán kàu éng-oán! Amen! Amen!

The Bible Society in Taiwan

Lean sinn:

Ceanglaichean taic

Sanasan