Bìoball air-loidhne

Si-phian 40 - 現代台語譯本羅馬字版

Siōng-chàn ê Koa
Tāi-pi̍t ê si, kau hō͘ sèng-ga̍k-tiúⁿ.

¹ Góa nāi-sim thèng-hāu Siōng Chú; I ū àⁿ hī-khang thiaⁿ góa ê ai-kiû.

² I tùi sí-bông ê hām-khiⁿ, tùi thô͘-bê tiong kā góa khiú--khí-lâi; I hō͘ góa khiā tī chio̍h-pôaⁿ téng, hō͘ góa ê kha-pō͘ ún-kò͘.

³ I kà góa gîm sin ê si, chhiùⁿ-koa o-ló lán ê Siōng-tè; chin chōe lâng khòaⁿ--tio̍h chiū kèng-ùi lâi sìn-khò Siōng Chú.

⁴ Choan-sim sìn-khò Siōng Chú ê lâng chin ū hok-khì! I bô pài ngó͘-siōng, bô kap pài ké-sîn ê lâng chòe-hé.

⁵ Siōng Chú — góa ê Siōng-tè ah, lí ū ūi goán sêng-chiū chin chōe kî-sū; siáⁿ-lâng ōe-tàng kap lí pí? Lí ūi goán an-pâi ê kè-ōe hiah-ni̍h chōe, beh kóng mā kóng bōe liáu.

⁶ Chè-sū kap lé-mi̍h, lí bô kah-ì; sio-hòa-chè kap sio̍k-chōe-chè, lí mā bô ài. Lí ū khui góa ê hī-khang thang thiaⁿ,

⁷ só͘-í góa ìn kóng, “Góa tī chia! Lí tùi góa ê chí-sī lóng kì tī Lu̍t-hoat.

⁸ Góa ê Siōng-tè ah, lí ê chí-ì góa hoaⁿ-hí thiaⁿ-thàn; lí ê Lu̍t-hoat tī góa sim-lāi.”

⁹ Góa tī tōa chū-hōe tiong soan-iông lí kong-gī ê hó siau-sit; Siōng chú ah, lí chai góa beh it-ti̍t soan-iông.

¹⁰ Góa m̄-bat chiong lí ê kong-gī khàm-ba̍t tī sim-lāi; góa í-keng ū kóng-khí lí ê sìn-si̍t kap kiù-un. Góa m̄-bat tī tōa chū-hōe tiong am-khàm lí ê chû-ài kap sìn-si̍t.

¹¹ Siōng Chú ah, kiû lí m̄-thang tùi góa siu-hôe lí ê chû-pi; goān lí ê chû-ài kap sìn-si̍t put-sî pó-siú góa.

¹² In-ūi ū sǹg bōe liáu ê chai-hō ûi-khùn góa; góa ê chōe-ok jip-tio̍h góa, hō͘ góa ê ba̍k-chiu bōe khòaⁿ--kìⁿ; chiah-ê chōe-ok pí góa ê thâu-mn̂g khah chōe; góa oân-choân sit-khì ióng-khì.

Kiû Pang-chān ê Kî-tó
( Si 70 )

¹³ Siōng Chú ah, kiû lí hoaⁿ-hí chín-kiù góa; Siōng Chú ah, kiû lí kín lâi pang-chān góa.

¹⁴ Goān siàu-siūⁿ beh hāi góa sìⁿ-miā ê lâng lóng làu-khùi kiàn-siàu; goān ài góa siū hām-hāi ê lâng pāi-thè siū lêng-jio̍k.

¹⁵ Goān tùi góa kóng “Hò͘, lí chhám ah” hiah-ê lâng, in-ūi kiàn-siàu bia̍t-bông.

¹⁶ Goān chhē-kiû lí ê lâng lóng in-ūi lí hoaⁿ-hí khoài-lo̍k; goān him-bō͘ lí chín-kiù ê lâng sî-siông kóng, “Tio̍h chun Siōng Chú chòe tōa!”

¹⁷ Chóng-sī góa khùn-khó͘ sàn-chhiah; Chú iáu-kú siàu-liām góa. Lí sī góa ê pang-chān, góa ê chín-kiù; góa ê Siōng-tè ah, kiû lí m̄-thang iân-chhiân.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan