Bìoball air-loidhne

Si-phian 39 - 現代台語譯本羅馬字版

Siū-khó͘ ê Lâng ê Kî-tó
Tāi-pi̍t ê si, kau hō͘ sèng-ga̍k-tiúⁿ Iâ-tō͘-tùn.

¹ Góa bat kóng, “Góa beh kín-sīn góa ê giân-hêng, chiah bián góa ê chi̍h hoān-chōe; pháiⁿ-lâng tī góa bīn-chêng ê sî, góa beh ēng chhùi-am iok-sok ka-kī ê chhùi-chi̍h.”

² Góa tiām-tiām bô chhut-siaⁿ, liân hó-ōe to bô kóng chhut-chhùi; góa ê thòng-khó͘ chiū ná ke-thiⁿ.

³ Góa lāi-sim it-ti̍t sio--khí-lâi, góa jú siūⁿ hé jú to̍h, góa chiū khui-chhùi kóng,

⁴ “Siōng Chú ah, kiû lí hō͘ góa chai ka-kī ê kiat-kio̍k, ka-kī ê nî-hè ū jōa-chōe, hō͘ góa chai ka-kī ê sìⁿ-miā chin kín chiū bô--khì.

⁵ “Lí hō͘ góa ê ji̍t-chí si̍t-chāi chin té; góa ê hè-siū tùi lí khòaⁿ--khí-lâi chha-put-to sī bô; lâng put-kò sī chi̍t ê khùi.

⁶ Lâng teh oa̍h chhin-chhiūⁿ iáⁿ; in bô-êng-chhih-chhih si̍t-chāi bô-chhái-kang; in só͘ chek-chū--ê m̄-chai siáⁿ-lâng ōe tit--khì.

⁷ “Chú ah, taⁿ góa tio̍h thèng-hāu sím-mi̍h? Góa ê ǹg-bāng chāi-tī lí.

⁸ Kiû lí kiù góa thoat-lī góa it-chhè ê kè-sit, hō͘ góa bián siū gōng-lâng ê lêng-jio̍k.

⁹ In-ūi sī lí hō͘ góa siū-khó͘, góa chēng-chēng bô khui-chhùi.

¹⁰ Lí hō͘ góa ê chek-hoa̍t, kiû lí kā góa tû--khì; in-ūi lí ê chhiú ê tok-chek, góa teh-beh siau-bia̍t.

¹¹ Lí chek-hoa̍t lâng, in-ūi in hoān-chōe; lí hō͘ in só͘ ì-ài--ê chhin-chhiūⁿ tio̍h chiù-thâng hu--khì. Lâng put-kò sī chi̍t ê khùi.

¹² “Siōng Chú ah, kiû lí thiaⁿ góa ê kî-tó, àⁿ hī-khang thiaⁿ góa ê khún-kiû; góa lâu ba̍k-sái, kiû lí m̄-thang bô chhut-siaⁿ. Góa sī i-óa lí ê chhut-gōa-lâng, kap góa ê lia̍t-chó͘ siâng-khoán sī kià-ku--ê.

¹³ Kiû lí khoan-iông góa, hō͘ góa iáu-bē sí í-chêng tit-tio̍h hoaⁿ-hí khoài-lo̍k.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan