Si-phian 38 - 現代台語譯本羅馬字版

Siū-khó͘ ê Lâng ê Kî-tó
Tāi-pi̍t kì-liām ê si.

¹ Siōng Chú ah, kiû lí m̄-thang siū-khì chek-pī góa, m̄-thang hoat tōa siū-khì chek-hoa̍t góa.

² Lí ê chìⁿ siā-ji̍p góa ê seng-khu; lí ê chhiú tāng-tāng chhi̍h góa.

³ Lí ê siū-khì hō͘ góa ê seng-khu bô chi̍t ūi kiān-choân; góa ê chōe-kò hō͘ góa ê kut-thâu bô chi̍t ki hó-hó.

⁴ Góa ê chōe-kò thia̍p--khí-lâi, chhiau-kè góa ê thâu-khak, chhin-chhiūⁿ tāng-tàⁿ hō͘ góa taⁿ bōe khí.

⁵ Góa in-ūi gû-gōng, tì-kàu khang-chhùi nōa koh chhàu.

⁶ Góa hō͘ chōe teh kah beh phih--lo̍h-khì, kui-ji̍t kiâⁿ-lâi-kiâⁿ-khì haiⁿ-haiⁿ-chhan.

⁷ Góa ê io chhin-chhiūⁿ hé teh to̍h; góa ê seng-khu bô kah chi̍t ūi kiān-choân.

⁸ Góa siū teh-siong, kui seng-khu bâ-pì; góa ê sim khó͘-thàng, tōa-siaⁿ ai-chhan.

⁹ Chú ah, góa ê sim-goān lí lóng chai; góa ê thó͘-khùi mā bô tùi lí am-khàm.

¹⁰ Góa ê sim pho̍k-pho̍k-chhéng, khùi-la̍t soe-bî, liân góa ê ba̍k-chiu to lóng bô-sîn.

¹¹ Góa ê pêng-iú tâng-phōaⁿ in-ūi góa ê pháiⁿ chèng-thâu lóng siám khui; góa ê chhin-lâng mā khiā-hn̄g-hn̄g.

¹² Siàu-siūⁿ góa sìⁿ-miā ê lâng siat lô-bāng; beh hāi góa ê lâng kóng ok-to̍k ê ōe, kui-ji̍t teh siat-kè khúi-khiat ê im-bô͘.

¹³ Góa chhin-chhiūⁿ chhàu-hī-lâng bōe thiaⁿ--kìⁿ, chhin-chhiūⁿ é-káu bōe kóng-ōe.

¹⁴ Góa chhin-chhiūⁿ bô thiaⁿ--kìⁿ ê lâng, ū chhùi mā bōe-tàng tap-piān.

¹⁵ Siōng Chú ah, góa gióng-bōng lí; Chú — góa ê Siōng-tè ah, lí beh ìn-tap góa.

¹⁶ Góa bat kóng, “Kiû lí m̄-thang hō͘ in tùi góa khoa-kháu; góa ê kha ta̍h-thu̍t ê sî, m̄-thang hō͘ in tùi góa khoa-iāu.”

¹⁷ In-ūi góa hiám-hiám-á poa̍h-tó; góa ê khó͘-thàng put-sî tîⁿ-tè góa.

¹⁸ Góa beh jīn góa ê chōe-ok, ūi-tio̍h góa ê chōe iu-būn.

¹⁹ Góa ê tùi-te̍k kiông koh ióng; bô-iân-bô-kò͘ oàn-hūn góa ê lâng ke-thiⁿ chin chōe.

²⁰ Ēng pháiⁿ pò hó ê lâng kap góa chòe tùi-thâu; in-ūi góa tui-kiû liông-siān.

²¹ Siōng Chú ah, m̄-thang pàng-sak góa; góa ê Siōng-tè ah, m̄-thang lī-khui góa hn̄g-hn̄g.

²² Chú — góa ê Kiù-chú ah, kín lâi kiù góa!

The Bible Society in Taiwan

Lean sinn:

Ceanglaichean taic

Sanasan