Si-phian 37 - 現代台語譯本羅馬字版

Gī-lâng kap Chōe-jîn ê Kiat-kio̍k
Tāi-pi̍t ê si.

¹ M̄-thang in-ūi chòe pháiⁿ ê lâng sim-lāi put-pêng; m̄-thang oàn-tò͘ hêng-ûi put-gī ê lâng;

² in-ūi in chhin-chhiūⁿ chháu chin kín chiū ta--khì, chhin-chhiūⁿ chhiⁿ-chhùi ê hoe-chháu lian--khì.

³ Tio̍h óa-khò Siōng Chú lâi chòe hó, tiàm tī chit-ê thó͘-tōe an-ku-lo̍k-gia̍p.

⁴ Tio̍h in-ūi Siōng Chú lâi hoaⁿ-hí; I ōe boán-chiok lí ê sim-goān.

⁵ Tio̍h chiong lí ê lō͘-tô͘ kau-thok Siōng Chú, óa-khò I, I ōe kā lí sêng-choân.

⁶ I ōe hō͘ lí ê gī chhin-chhiūⁿ kng hoat-chhut; lí ê chèng-ti̍t chhin-chhiūⁿ tiong-tàu ê ji̍t-thâu.

⁷ Tio̍h chēng-chēng tī Siōng Chú bīn-chêng thun-lún thèng-hāu; m̄-thang in-ūi pháiⁿ-lâng ê kè-bô͘ sêng-kong lâi put-pêng.

⁸ M̄-thang siū-khì, tio̍h khì-sak tōa siū-khì; m̄-thang put-pêng, chiah bián tì-kàu chòe pháiⁿ.

⁹ In-ūi chòe pháiⁿ ê lâng ōe siū châu-bia̍t; thèng-hāu Siōng Chú ê lâng ōe sêng-siū só͘ èng-ún ê thó͘-tōe.

¹⁰ Pháiⁿ-lâng chin kín chiū ōe bô--khì; lí siông-sè chhâ i ê só͘-chāi, mā chhē bōe tio̍h.

¹¹ M̄-kú khiam-pi ê lâng ōe sêng-siū só͘ èng-ún ê thó͘-tōe, hióng-siū hoân-êng hô-pêng.

¹² Pháiⁿ-lâng siat-kè beh hāi gī-lâng, thòng-hūn i, tùi i kā-gê-chhiat-chhí.

¹³ Chú ōe kā i thí-chhiò, in-ūi chai i siū pò-èng ê ji̍t-chí teh-beh kàu.

¹⁴ Pháiⁿ-lâng pu̍ih to khui keng, beh táⁿ-tó khùn-khó͘ sàn-chhiah ê lâng, thâi-sí hêng-ûi chèng-ti̍t ê lâng.

¹⁵ In ê to ōe chha̍k ji̍p-khì ka-kī ê sim; in ê keng ōe siū at-tn̄g.

¹⁶ Gī-lâng só͘-ū--ê sui-jiân chin chió, mā pí pháiⁿ-lâng ū chin chōe châi-hù khah hó.

¹⁷ Pháiⁿ-lâng ê chhiú-kut ōe siū at-tn̄g, m̄-kú Siōng Chú hû-chhî gī-lâng.

¹⁸ Siōng Chú koàn-kò͘ oân-choân ê lâng ê nî-ji̍t; in ê sán-gia̍p ōe-tàng éng-oán pó-chûn.

¹⁹ In tī hoān-lān ê sî bōe tì-kàu kiàn-siàu, tī ki-hng ê ji̍t ōe tit-tio̍h pá-chiok.

²⁰ Chóng-sī pháiⁿ-lâng ōe bia̍t-bông. Siōng Chú ê tùi-te̍k ōe ká-ná iá-hoe siā--khì, chhin-chhiūⁿ hé-hun siau-sòaⁿ.

²¹ Pháiⁿ-lâng kā lâng chioh, m̄ hêng; gī-lâng khóng-khài si-sià.

²² Siōng Chú sù-hok ê lâng ōe sêng-siū só͘ èng-ún ê thó͘-tōe; siū I chiù-chó͘ ê lâng ōe bia̍t-bông.

²³ Siōng Chú hō͘ gī-lâng ê kha-pō͘ ún-kò͘; I hoaⁿ-hí in ê só͘-kiâⁿ-só͘-chòe.

²⁴ In tio̍h-tak mā bōe poa̍h-tó, in-ūi Siōng Chú ēng chhiú hû in.

²⁵ Góa chêng siàu-liân taⁿ nî-lāu, m̄-bat khòaⁿ-tio̍h gī-lâng siū pàng-sak, i ê hō͘-tāi chòe khit-chia̍h.

²⁶ I put-sî khóng-khài si-sià, hoaⁿ-hí chioh--lâng; i ê kiáⁿ-sun tit-tio̍h chiok-hok.

²⁷ Tio̍h kū-choa̍t pháiⁿ, chòe hó-sū, chiū ōe éng-oán an-jiân khiā-khí.

²⁸ Siōng Chú ì-ài kong-pêng, bōe pàng-sak I sèng ê chú-bîn. In éng-oán siū pó-hō͘; m̄-kú pháiⁿ-lâng ê kiáⁿ-sun ōe siū châu-bia̍t.

²⁹ Gī-lâng ōe sêng-siū só͘ èng-ún ê thó͘-tōe, éng-oán tiàm tī hia.

³⁰ Gī-lâng ê chhùi kóng tì-hūi; i ê chi̍h tâm-lūn kong-pêng.

³¹ Siōng-tè ê lu̍t-hoat tī i sim-lāi; i ê kha lóng bōe ta̍h-thu̍t.

³² Pháiⁿ-lâng kim-kim teh siòng gī-lâng, siàu-siūⁿ beh thâi i.

³³ Siōng Chú bōe pàng i lo̍h tī pháiⁿ-lâng ê chhiú, sím-phòaⁿ ê sî i bōe siū tēng-chōe.

³⁴ Tio̍h thèng-hāu Siōng Chú, chun-siú I ê tō-lō͘, I chiū ko-seng lí, hō͘ lí sêng-siū só͘ èng-ún ê thó͘-tōe; lí ōe khòaⁿ-tio̍h pháiⁿ-lâng siau-bia̍t.

³⁵ Góa khòaⁿ-kìⁿ kiông-pō ê pháiⁿ-lâng heng-ōng, chhin-chhiūⁿ chhiū tī ka-kī ê thó͘-tōe bō͘-sēng.

³⁶ Ū lâng tùi hia keng-kè, khòaⁿ leh, i bô--khì lah; góa chhē mā chhē lóng bô.

³⁷ Siông-sè khòaⁿ oân-choân chèng-ti̍t ê lâng, in-ūi ài hô-pêng ê lâng ū hó ê chiong-lâi.

³⁸ M̄-kú hoān-hoat ê lâng ōe chòe-chi̍t-ē bia̍t-bông; pháiⁿ-lâng chòe-āu ōe siū châu-bia̍t.

³⁹ Chóng-sī gī-lâng tùi Siōng Chú tit-tio̍h chín-kiù; hoān-lān ê sî, I chòe in ê pī-lān-só͘.

⁴⁰ Siōng Chú pang-chān in, chín-kiù in; I kiù in, tháu-pàng in thoat-lī pháiⁿ-lâng, in-ūi in óa-khò I tit-tio̍h pó-hō͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan