Si-phian 36 - 現代台語譯本羅馬字版

Lâng ê Chōe-ok kap Siōng-tè ê Kong-gī
Siōng Chú ê po̍k-jîn Tāi-pi̍t ê si, kau hō͘ sèng-ga̍k-tiúⁿ.

¹ Chōe tī pháiⁿ-lâng ê sim-tóe chhek-tōng; i gán-tiong m̄ kiaⁿ Siōng-tè.

² Tùi i lâi khòaⁿ, chōe sī i ê khoa-kháu, ka-kī siūⁿ-kóng Siōng-tè bōe hoat-kiàn, bōe iàm-ò͘ⁿ.

³ I kóng ê ōe lóng sī chōe-ok kap kan-chà; i bô koh-chài ū tì-hūi, mā bô hó ê hêng-ûi.

⁴ I tī bîn-chhn̂g téng iáu-teh kè-bô͘ chōe-ok. I koat-tēng beh kiâⁿ pháiⁿ-lō͘, m̄ khì-sak pháiⁿ-tāi.

⁵ Siōng Chú ah, lí ê chû-ài koân kàu tú-thiⁿ; lí ê sìn-si̍t kàu kiong-chhong.

⁶ Lí ê kong-gī chhin-chhiūⁿ ke̍k-koân ê soaⁿ; lí ê phòaⁿ-toàn chhin-chhiūⁿ chhim-ian. Siōng Chú ah, lâng kap cheng-siⁿ lí lóng koàn-kò͘.

⁷ Siōng-tè ah, lí ê chû-ài ná hiah pó-pòe! Sè-kan-lâng lóng lâi bih tī lí si̍t-kó͘ ê pó-hō͘-ē.

⁸ In beh tī lí ê chhù hióng-siū hong-hù ê iàn-se̍k; lí beh hō͘ in lim lí khoài-lo̍k ê hô-chúi.

⁹ In-ūi oa̍h-miā ê goân-thâu chāi-tī lí; tùi lí ê kng, goán khòaⁿ-kìⁿ kng.

¹⁰ Goān lí kè-sio̍k si-lo̍h chû-ài hō͘ bat lí ê lâng, si-lo̍h kong-gī hō͘ sim-lāi chèng-ti̍t ê lâng.

¹¹ M̄-thang iông-ún kiau-ngō͘ ê lâng ê kha thún-ta̍h góa; m̄-thang iông-ún hiong-ok ê lâng ê chhiú kóaⁿ-tio̍k góa.

¹² Lí khòaⁿ, chòe pháiⁿ ê lâng í-keng tó--lo̍h-khì; in siū chhia-tó, bōe-tàng koh khí--lâi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan