Bìoball air-loidhne

Si-phian 35 - 現代台語譯本羅馬字版

Kiû Pang-chān ê Kî-tó
Tāi-pi̍t ê si.

¹ Siōng Chú ah, kap góa cheng-lūn ê lâng, kiû lí kap in cheng-lūn; kap góa kau-chiàn ê lâng, kiû lí kap in kau-chiàn.

² Kiû lí the̍h tōa-sòe ê tún-pâi khí-lâi pang-chān góa,

³ ēng chhiuⁿ tùi-hù tui-kóaⁿ góa ê lâng. Kiû lí tùi góa kóng, “Góa sī lí ê Chín-kiù-chiá.”

⁴ Kiû lí hō͘ siàu-siūⁿ góa sìⁿ-miā ê lâng siū lêng-jio̍k kiàn-siàu; kiû lí hō͘ kè-bô͘ hām-hāi góa ê lâng thiat-thè làu-khùi.

⁵ Kiû lí hō͘ in chhin-chhiūⁿ hō͘ hong chhe ê chho͘-khng, ū Siōng Chú ê sù-chiá kā in kóaⁿ-sòaⁿ.

⁶ Kiû lí hō͘ in ê lō͘ àm koh ku̍t, ū Siōng Chú ê sù-chiá kā in tui-kóaⁿ.

⁷ In bô-iân-bô-kò͘ àm-siat lô-bāng beh tng góa, ku̍t hām-khiⁿ beh hāi góa ê sìⁿ-miā.

⁸ Kiû lí hō͘ chai-hō tī bô phah-sǹg ê sî lîm-kàu in sin-chiūⁿ; lí hō͘ in àm-siat ê lô-bāng tîⁿ-tio̍h ka-kī, poa̍h-lo̍h hit lāi-bīn siū hāi.

⁹ Án-ni, góa ê sim ōe in-ūi Siōng Chú khoài-lo̍k, in-ūi I ê kiù-un hoaⁿ-hí.

¹⁰ Góa kui-ê lâng lóng beh kóng, “Siōng Chú ah, bô lâng ōe-tàng kap lí pí! Lí chín-kiù khùn-khó͘--ê thoat-lī pí i khah kiông ê lâng, chín-kiù khùn-khó͘ sàn-chhiah--ê thoat-lī chhiúⁿ-toa̍t i ê lâng.”

¹¹ Hiong-ok ê kiàn-chèng-jîn khiā--chhut-lâi; in chhâ-mn̄g góa m̄-chai ê sū.

¹² In tùi góa ēng pháiⁿ pò hó, hō͘ góa ko͘-khó͘-bû-chō͘.

¹³ M̄-kú, in phòa-pīⁿ ê sî, góa chhēng môa-saⁿ pi-siong, khek-khó͘ kìm-chia̍h, ūi-tio̍h in àⁿ-thâu kî-tó.

¹⁴ Góa khoán-thāi in chòe góa ê pêng-iú, chòe góa ê hiaⁿ-tī; góa khut-lo̍h ai-siong, ká-ná ūi-tio̍h lāu-bú sí--khì teh pi-siong.

¹⁵ M̄-kú góa poa̍h-tó sit-pāi ê sî, in tàu-tīn hoaⁿ-hí; liân siⁿ-hūn-lâng mā it-ti̍t kā góa lêng-jio̍k kong-kek.

¹⁶ In chòe-hé phì-siùⁿ góa, thí-chhiò góa, thòng-hūn góa, tùi góa kā-gê-chhiat-chhí.

¹⁷ Chú ah, lí ná tiām-tiām teh khòaⁿ, beh khòaⁿ jōa kú? Kiû lí kiù góa thoat-lī in ê chân-hāi, kiù góa ê sìⁿ-miā thoat-lī siàu-chòng ê sai.

¹⁸ Góa beh tī tōa chū-hōe tiong kám-siā lí, tī chèng-lâng ê tiong-kan chheng-chàn lí.

¹⁹ Kiû lí m̄-thang iông-ún bô-iân-bô-kò͘ te̍k-tùi góa ê lâng tùi góa khoa-kháu, m̄-thang hō͘ bô lí-iû oàn-hūn góa ê lâng kā góa gîn.

²⁰ In-ūi in bô kóng hô-pêng ê ōe, tian-tò chō-iâu tiòng-siong ì-ài hô-pêng ê lâng.

²¹ In khui-chhùi tōa-siaⁿ kong-kek góa, kóng, “Lí khòaⁿ leh! Goán ū chhin-ba̍k khòaⁿ--tio̍h.”

²² Siōng Chú ah, lí í-keng ū khòaⁿ--tio̍h, kiû lí m̄-thang tiām-tiām; Chú ah, m̄-thang khiā-hn̄g-hn̄g m̄ chhap góa.

²³ Góa ê Siōng-tè, góa ê Chú ah, kiû lí cheng-sîn, kiû lí khí--lâi, ūi góa piān-hō͘, thòe góa sin-oan.

²⁴ Siōng Chú — góa ê Siōng-tè ah, kiû lí chiàu lí ê kong-gī phòaⁿ-toàn, m̄-thang hō͘ in tī góa ê bīn-chêng iông-iông-tek-ì.

²⁵ M̄-thang iông-ún in sim-lāi kóng, “Lí khòaⁿ, tāi-chì tú chiàu goán ê sim-goān!” M̄-thang iông-ún in kóng, “Goán í-keng kā i thun--lo̍h-khì.”

²⁶ Goān ài góa tú-tio̍h hoān-lān ê lâng kiàn-siàu làu-khùi; goān kiau-ngō͘ tùi-thāi góa ê lâng lóng sit-bāng kiàn-siàu.

²⁷ Goān ài góa siū phòaⁿ bô chōe ê lâng khoài-lo̍k chhiùⁿ-koa; goān in put-sî kóng, “Tio̍h chun Siōng Chú chòe tōa, in-ūi I ì-ài I ê po̍k-jîn pêng-an hoân-êng.”

²⁸ Góa ê chhùi-chi̍h beh soan-iông lí ê gī, kui-ji̍t lóng chheng-chàn lí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan