Bìoball air-loidhne

Si-phian 34 - 現代台語譯本羅馬字版

Kám-siā Siōng Chú ê Pó-hō͘
Tāi-pi̍t ê si. I tī A-pí-bí-le̍k bīn-chêng ké hong-tian, siū kóaⁿ--chhut-khì ê sî chòe ê si.

¹ Góa beh put-sî chheng-chàn Siōng Chú; góa ê chhùi beh siông-siông o-ló I.

² Góa ê sim-sîn beh khoa-kháu Siōng Chú; khùn-khó͘ ê lâng thiaⁿ--kìⁿ mā ōe hoaⁿ-hí.

³ Tio̍h kap góa chheng-chàn Siōng Chú chòe tōa, chòe-hé chun-chông I ê miâ.

⁴ Góa kiû-kiò Siōng Chú, I ū ìn góa, kiù góa thoat-lī it-chhè ê kiaⁿ-hiâⁿ.

⁵ Gióng-bōng I ê lâng bīn ū kong-chhái, sim khoài-lo̍k; in éng-oán bōe tì-kàu kiàn-siàu sit-bāng.

⁶ Sàn-chhiah-lâng kiû-kiò, Siōng Chú ū thiaⁿ--kìⁿ, kiù i thoat-lī it-chhè ê kan-lân.

⁷ Siōng Chú ê sù-chiá tī kèng-ùi I ê lâng ê sì-ûi chat-iâⁿ, kiù in thoat-chhut khùn-kéng.

⁸ Chhin-sin thé-giām, chiū chai Siōng Chú chin hó; chhē I chòe pī-lān-só͘ ê lâng chin ū hok-khì.

⁹ Siōng Chú sèng ê chú-bîn ah, tio̍h kèng-ùi I, in-ūi kèng-ùi I ê lâng lóng bô khiàm-kheh.

¹⁰ Siàu-chòng ê sai mā ōe khiàm-kheh, ōe iau, m̄-kú chhē-kiû Siōng Chú ê lâng sím-mi̍h hó-mi̍h to bô khiàm.

¹¹ Sòe-kiáⁿ ah, tio̍h lâi thiaⁿ, góa beh kà-sī lín kèng-ùi Siōng Chú.

¹² Lín tiong-kan siáⁿ-lâng ì-ài sìⁿ-miā, ài tn̂g-hè-siū thang hióng-hok?

¹³ Tio̍h kìm ka-kī ê chi̍h bô kóng pháiⁿ-ōe, kìm-chí chhùi-tûn bô kóng khúi-chà.

¹⁴ Tio̍h kū-choa̍t pháiⁿ, chòe hó-sū, jia̍t-sim tui-kiû hô-pêng.

¹⁵ Siōng Chú ê ba̍k-chiu khòaⁿ-kò͘ gī-lâng; I ê hī-khang thiaⁿ in ê kî-tó.

¹⁶ Siōng Chú tùi choh-pháiⁿ ê lâng pìⁿ-bīn, tùi sè-kan chhat-siau in ê miâ.

¹⁷ Siōng Chú thiaⁿ gī-lâng ê kiû-kiò, kiù in thoat-lī it-chhè ê kan-lân.

¹⁸ Siōng Chú chhin-kūn sim-lêng phò-chhùi ê lâng, chín-kiù sim thòng-hóe ê lâng.

¹⁹ Gī-lâng ū chin chōe khó͘-lān, m̄-kú Siōng Chú kiù in lóng thoat-lī.

²⁰ Siōng Chú pó-choân in lóng-chóng ê kut-thâu, chi̍t ki to bô phah-chi̍h.

²¹ Chōe-ok ōe hāi-sí pháiⁿ-lâng; oàn-hūn gī-lâng--ê, ōe siū tēng-chōe.

²² Siōng Chú kiù-sio̍k I ê po̍k-jîn; óa-khò I ê lâng liân chi̍t ê to bōe siū tēng-chōe.

The Bible Society in Taiwan

Lean sinn:

Ceanglaichean taic

Sanasan