Si-phian 33 - 現代台語譯本羅馬字版

Chheng-chàn Só͘ Gióng-bōng ê Chhòng-chō-chú
Tāi-pi̍t ê si, kau hō͘ sèng-ga̍k-tiúⁿ.

¹ Gī-lâng ah, tio̍h in-ūi Siōng Chú lâi hoaⁿ-hí; chèng-ti̍t ê lâng eng-kai tio̍h chheng-chàn I.

² Lín tio̍h tôaⁿ-khîm kám-siā Siōng Chú, ēng cha̍p tiâu hiân ê khiā-khîm chheng-chàn I,

³ tôaⁿ hō͘ chin súi. Tio̍h tùi I chhiùⁿ sin ê koa, tōa-siaⁿ hoan-ho͘.

⁴ In-ūi Siōng Chú ê ōe chèng-khak; I ê chok-ûi lóng khó-khò.

⁵ Siōng Chú ì-ài kong-pêng chèng-ti̍t; I ê chû-ài phó͘-ki̍p choân-tōe.

⁶ Kiong-chhong tùi Siōng Chú ê ōe chhòng-chō; ji̍t, ge̍h, chhiⁿ-sîn tùi I ê chhùi pûn ê khùi chō-chiâⁿ.

⁷ I kā hái-chúi chi̍p chòe-tui, kā chhim-ian siu tī chhng-khò͘.

⁸ Choân-tōe tio̍h kèng-ùi Siōng Chú; sè-kan-lâng lóng tio̍h kiaⁿ-ùi I.

⁹ I chi̍t-ē kóng, ú-tiū chiū chhut-hiān; I chi̍t-ē bēng-lēng, bān-iú chiū hêng-sêng.

¹⁰ Siōng Chú hō͘ lia̍t-pang ê kè-bô͘ lo̍k-khong, hō͘ bān-bîn ê kè-bô͘ sit-hāu.

¹¹ Siōng Chú ê kè-ōe éng-oán bōe piàn; I ê sim-ì sòa kàu bān sè-tāi.

¹² Jīn Siōng Chú chòe Siōng-tè hit-ê kok chin ū hok-khì! Siū kéng-soán chòe I sán-gia̍p hit-ê chú-bîn chin ū hok-khì!

¹³ Siōng Chú tùi thiⁿ-téng teh khòaⁿ, khòaⁿ-kìⁿ lóng-chóng ê sè-kan-lâng.

¹⁴ I tùi I ê pó-chō khòaⁿ--lo̍h-khì, khòaⁿ tōe-chiūⁿ só͘-ū ê chū-bîn.

¹⁵ I chō chèng-lâng ê sim, liáu-kái in it-chhè ê chok-ûi.

¹⁶ Kun-ông bōe in-ūi peng chōe chiū sèng-lī; ióng-sū bōe in-ūi khùi-la̍t tōa chiū ōe iâⁿ.

¹⁷ Khò chiàn-bé bô it-tēng ōe thâi-iâⁿ; khò bé ê ui-le̍k bô it-tēng ōe kiù lâng.

¹⁸ Siōng Chú ê ba̍k-chiu khòaⁿ-kò͘ kèng-ùi I ê lâng, koàn-kò͘ gióng-bōng I chû-ài ê lâng.

¹⁹ I ōe kiù in ê sìⁿ-miā thoat-lī sí-bông, pó-chûn in tō͘-kè ki-hng.

²⁰ Goán ê sim-sîn thèng-hāu Siōng Chú; I sī goán ê pang-chān, goán ê tún-pâi.

²¹ Goán ê sim beh in-ūi I lâi hoaⁿ-hí, in-ūi goán óa-khò I ê sèng-miâ.

²² Siōng Chú ah, goān lí ê chû-ài si-lo̍h hō͘ goán, in-ūi goán gióng-bōng lí.

The Bible Society in Taiwan

Lean sinn:

Ceanglaichean taic

Sanasan