Bìoball air-loidhne

Si-phian 28 - 現代台語譯本羅馬字版

Kiû Pang-chān ê Kî-tó
Tāi-pi̍t ê si.

¹ Siōng Chú ah, góa kiû-kiò lí; góa ê chio̍h-pôaⁿ ah, m̄-thang m̄ chhap góa. Lí nā tùi góa chēng-chēng, góa chiū chhin-chhiūⁿ ji̍p bōng-khòng-khang ê lâng.

² Góa kiû-kiò lí, ǹg lí ê Chì-sèng-só͘ gia̍h-chhiú kî-tó ê sî, kiû lí thiaⁿ góa khún-kiû ê siaⁿ.

³ M̄-thang chiong góa kap pháiⁿ-lâng, í-ki̍p choh-ok ê lâng chòe-chi̍t-ē siau-bia̍t; in kap chhù-piⁿ kóng hô-pêng ê ōe, m̄-kú sim im-hiám.

⁴ Goān lí chiàu in ê só͘-chòe, chiàu in só͘ kiâⁿ ê pháiⁿ-tāi pò-èng in. Goān lí chiàu in ê chhiú ê só͘-chòe pò-èng in, chiàu in eng-kai siū--ê kā in chhú-hoa̍t.

⁵ In-ūi in biáu-sī Siōng Chú ê chok-ûi, kap I ê chhiú só͘ chòe--ê; I ōe húi-hoāi in, bōe kā in tiông-kiàn.

⁶ Siōng Chú eng-kai siū chheng-chàn, in-ūi I ū thiaⁿ góa khún-kiû ê siaⁿ.

⁷ Siōng Chú sī góa ê khùi-la̍t, góa ê tún-pâi; góa óa-khò I. Siōng Chú pang-chān góa, góa ê sim tōa hoaⁿ-hí; góa beh ēng si-koa chheng-chàn I.

⁸ Siōng Chú sī I chú-bîn ê khùi-la̍t, sī I soán-li̍p ê ông tit-kiù ê pī-lān-só͘.

⁹ Kiû lí kái-kiù lí ê chú-bîn, sù-hok hō͘ chòe lí sán-gia̍p ê chú-bîn; kiû lí chòe in ê bo̍k-chiá éng-oán hû-chhî in.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan