Bìoball air-loidhne

Si-phian 27 - 現代台語譯本羅馬字版

Sìn-khò Siōng Chú
Tāi-pi̍t ê si.

¹ Siōng Chú sī góa ê kng, góa ê chín-kiù, góa iáu tio̍h kiaⁿ siáⁿ-lâng? Siōng Chú sī góa sìⁿ-miā ê pó-chiong, góa iáu tio̍h kiaⁿ siáⁿ-lâng?

² Sui-jiân pháiⁿ-lâng kong-kek góa, tùi-te̍k thun-chia̍h góa, in lóng ōe poa̍h-tó sit-pāi.

³ Sui-jiân tāi-kun chat-iâⁿ pau-ûi, góa ê sim ia̍h bōe kiaⁿ-hiâⁿ. Sui-jiân tùi-te̍k hoat-tōng chiàn-cheng, góa iû-goân an-ún chū-chāi.

⁴ Góa tùi Siōng Chú kiû chi̍t hāng tāi-chì, chí-ū tùi I kiû chit-hāng: Hō͘ góa chi̍t-sì-lâng tiàm tī Siōng Chú ê chhù, tī sèng-tiān gióng-bōng I ê êng-kng, chhē-kiû I ê chí-sī.

⁵ Góa tú-tio̍h hoān-lān ê sî, I ōe kā góa chhàng tī pò͘-pîⁿ lāi; I ōe pó-hō͘ góa, hō͘ góa bih tī I chhù-lāi. I ōe kā góa khǹg tī chio̍h-pôaⁿ téng,

⁶ hō͘ góa ê thâu gia̍h-koân, chhiau-kè pau-ûi góa ê tùi-te̍k. Góa beh tī I ê pò͘-pîⁿ hoan-ho͘ hiàn-chè; góa beh chhiùⁿ-koa o-ló Siōng Chú.

⁷ Siōng Chú ah, góa kiû-kiò ê siaⁿ kiû lí thiaⁿ, kiû lí lîn-bín góa, ìn-tap góa!

⁸ Góa ê sim tùi góa kóng, “Tio̍h lâi tiâu-kìⁿ I.” Siōng Chú ah, góa lâi tiâu-kìⁿ lí.

⁹ Kiû lí m̄-thang bīn oa̍t-cháu m̄ chhap góa, m̄-thang siū-khì kóaⁿ lí ê po̍k-jîn. Lí it-ti̍t sī góa ê pang-chān. Chín-kiù góa ê Siōng-tè ah, kiû lí m̄-thang kū-choa̍t góa, pàng-sak góa.

¹⁰ Siat-sú góa ê pē-bú khì-sak góa, Siōng Chú mā it-tēng ōe siu-liû góa.

¹¹ Siōng Chú ah, kiû lí chí-sī góa eng-kai kiâⁿ ê lō͘, in-ūi tùi-te̍k teh tng-tán, kiû lí chhōa góa kiâⁿ pîⁿ-tháⁿ ê lō͘.

¹² M̄-thang chiàu tùi-te̍k ê sim-goān kā góa kau hō͘ in, in-ūi in ēng gūi-chèng khióng-hat góa.

¹³ Góa chhim-sìn chi̍t hāng sū: Góa iáu oa̍h--teh ê ji̍t ōe hióng-siū Siōng Chú ê un-hūi.

¹⁴ Tio̍h sìn-khò Siōng Chú! Tio̍h ióng-kám chòng-táⁿ! Tio̍h sìn-khò Siōng Chú!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan