Bìoball air-loidhne

Si-phian 26 - 現代台語譯本羅馬字版

Chèng-ti̍t ê Lâng ê Kî-tó
Tāi-pi̍t ê si.

¹ Siōng Chú ah, kiû lí phòaⁿ góa bô chōe, in-ūi góa ū chiàu chèng-ti̍t teh kiâⁿ. Góa óa-khò Siōng Chú bô tōng-iâu.

² Siōng Chú ah, kiû lí kàm-chhat góa, khó-giām góa; kiû lí chhat-giām góa ê sim-su ì-liām.

³ In-ūi lí ê chû-ài tī góa ê ba̍k-chiu chêng; góa ū chiàu lí ê chin-lí teh kiâⁿ.

⁴ Góa m̄-bat kap hu-ké ê lâng chòe-hé chē, mā m̄-bat kap ké-hó ê lâng tàu-tīn.

⁵ Góa iàm-ò͘ⁿ kap pháiⁿ-lâng kiat-tóng, bô ài kap ok-to̍k ê lâng chòe-hé chē.

⁶ Siōng Chú ah, góa sóe-chhiú piáu-sī bô chōe, se̍h lí ê chè-tôaⁿ chham-ka lé-pài;

⁷ góa ēng kám-siā ê si-koa siōng-chàn, kóng-khí lí it-chhè kî-biāu ê chok-ûi.

⁸ Siōng Chú ah, góa ì-ài lí tòa ê chhù, ì-ài lí ê êng-kng lîm-chāi ê só͘-chāi.

⁹ M̄-thang chiong góa ê sìⁿ-miā kap chōe-jîn chòe-hé siau-bia̍t; m̄-thang chiong góa ê oa̍h-miā kap thâi-lâng--ê chòe-chi̍t-ē siau-bia̍t.

¹⁰ In ê chhiú put-sî chòe pháiⁿ; in ê chiàⁿ-chhiú ta̍k só͘-chāi siu hóe-lō͘.

¹¹ Nā-sī góa, góa beh chiàu chèng-ti̍t lâi kiâⁿ; kiû lí kiù-sio̍k góa, lîn-bín góa.

¹² Góa ê kha khiā tī pîⁿ-tháⁿ ê só͘-chāi; góa beh tī tāi-hōe tiong chheng-chàn Siōng Chú.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan