Bìoball air-loidhne

Si-phian 25 - 現代台語譯本羅馬字版

Kiû Siōng Chú Ín-chhōa Pó-hō͘
Tāi-pi̍t ê si.

¹ Siōng Chú ah, góa ê sim-sîn gióng-bōng lí!

² Góa ê Siōng-tè ah, góa sìn-khò lí! M̄-thang hō͘ góa sit-pāi tì-kàu kiàn-siàu; m̄-thang hō͘ góa ê tùi-te̍k in-ūi iâⁿ góa lâi khoa-kháu.

³ Só͘-ū thèng-hāu lí pang-chān ê lâng it-tēng bōe tì-kàu kiàn-siàu; ōe tú-tio̍h kiàn-siàu--ê sī hiah-ê bô-iân-bô-kò͘ pōe-poān lí ê lâng.

⁴ Siōng Chú ah, kiû lí chiong lí ê lō͘ chí-sī góa, chiong lí ê tō kà-sī góa.

⁵ Kiû lí ēng lí ê chin-lí ín-chhōa góa, kà-sī góa, in-ūi lí sī chín-kiù góa ê Siōng-tè. Góa kui-ji̍t thèng-hāu lí.

⁶ Siōng Chú ah, kiû lí ōe-kì-tit lí ê lîn-bín kap chû-ài, in-ūi lí tùi kó͘-chá chiū án-ni tùi-thāi lâng.

⁷ Kiû lí m̄-thang kì-tiâu góa siàu-liân ê sî ê chōe-kò kap kè-sit; Siōng Chú ah, kiû lí chiàu lí ê chû-ài, in-ūi lí ê un-hūi ōe-kì-tit góa.

⁸ In-ūi Siōng Chú liông-siān koh chèng-ti̍t, I beh chí-sī chōe-jîn kiâⁿ chiàⁿ-lō͘.

⁹ I beh ēng kong-pêng ín-chhōa khiam-pi ê lâng, ēng I ê tō-lō͘ kà-sī khiam-sùn ê lâng.

¹⁰ Siú I ê iok kap I ê kài-bēng ê lâng, Siōng Chú lóng ēng chû-ài kap sìn-si̍t khoán-thāi in.

¹¹ Siōng Chú ah, góa ê chōe chin tāng, kiû lí sià-bián góa.

¹² Kèng-ùi Siōng Chú ê lâng, Siōng Chú beh chí-sī i só͘ tio̍h kéng ê lō͘.

¹³ I ê sim-sîn ōe tit-tio̍h an-hioh; i ê hō͘-tāi ōe sêng-chiap só͘ èng-ún ê thó͘-tōe.

¹⁴ Siōng Chú kap kèng-ùi I ê lâng chhin-bi̍t, beh chiong I ê iok chí-sī in.

¹⁵ Góa ê ba̍k-chiu put-sî gióng-bōng Siōng Chú, I beh hō͘ góa ê kha thoat-lī lô-bāng.

¹⁶ Kiû lí oa̍t kè-lâi khòaⁿ góa, lîn-bín góa, in-ūi góa ko͘-toaⁿ khùn-khó͘.

¹⁷ Góa sim-lāi ū chin chōe iu-khó͘, kiû lí kiù góa thoat-lī lóng-chóng ê hoān-lān.

¹⁸ Kiû lí koan-sim góa ê kan-lân khùn-khó͘, tû-khì góa it-chhè ê chōe.

¹⁹ Lí khòaⁿ, góa ê tùi-te̍k hiah-ni̍h chōe; in chin ok-to̍k oàn-hūn góa.

²⁰ Kiû lí pó-hō͘ góa ê sìⁿ-miā, chín-kiù góa, hō͘ góa bô sit-pāi tì-kàu kiàn-siàu, in-ūi góa óa-khò lí.

²¹ Goān sûn-choân chèng-ti̍t pó-hō͘ góa, in-ūi góa gióng-bōng lí.

²² Siōng-tè ah, kiû lí kiù-sio̍k Í-sek-lia̍t thoat-lī it-chhè ê chai-lān.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan