Si-phian 24 - 現代台語譯本羅馬字版

Úi-tāi ê Kun-ông
Tāi-pi̍t ê si.

¹ Tōe kap tōe-chiūⁿ ê bān-mi̍h lóng sio̍k Siōng Chú; Sè-kài kap tiàm tī hia ê oa̍h-mi̍h mā lóng sio̍k I.

² I kā tōe khǹg tī tōa-hái ê téng-bīn, chiong tōe-ki hē tī chhim-hái.

³ Sím-mi̍h khoán lâng ōe-tàng chiūⁿ Siōng Chú ê soaⁿ? Sím-mi̍h khoán lâng ōe-tàng ji̍p I ê sèng-tiān?

⁴ Chiū-sī chhiú chheng-khì, sim sûn-kiat, bô pài ngó͘-siōng, bô sûi-piān chiù-chōa ê lâng.

⁵ Chit-khoán lâng ōe siū Siōng Chú chiok-hok; Siōng-tè beh chín-kiù i, soan-phòaⁿ i bô chōe.

⁶ Chit-khoán lâng chhē-kiû Siōng Chú, kàu Ngá-kok ê Siōng-tè bīn-chêng lâi tiâu-kìⁿ I.

⁷ Siâⁿ-mn̂g ah, tio̍h phah-khui! Éng-oán ê mn̂g ah, tio̍h tōa khui! Êng-iāu ê Kun-ông beh ji̍p--lâi.

⁸ Chit-ūi Êng-iāu ê Kun-ông sī sím-mi̍h-lâng? Sī kiông koh ióng ê Siōng Chú! I sī pek-chiàn-pek-sèng ê Siōng Chú!

⁹ Siâⁿ-mn̂g ah, tio̍h phah-khui! Éng-oán ê mn̂g ah, tio̍h tōa khui! Êng-iāu ê Kun-ông beh ji̍p--lâi.

¹⁰ Chit-ūi Êng-iāu ê Kun-ông sī sím-mi̍h-lâng? Sī Siōng Chú — Bān-kun ê Thóng-sòe! I sī Êng-iāu ê Kun-ông!

The Bible Society in Taiwan

Lean sinn:

Ceanglaichean taic

Sanasan