Si-phian 19 - 現代台語譯本羅馬字版

Siōng-tè ê Chhòng-chō kap Lu̍t-hoat
Tāi-pi̍t ê si, kau hō͘ sèng-ga̍k-tiúⁿ.

¹ Thiⁿ soan-pò͘ Siōng-tè ê êng-iāu; kiong-chhong thoân-iông I ê chok-ûi.

² Chit-ji̍t tùi hit-ji̍t kóng-ōe; chit-mî tùi hit-mî thoân-pò͘ tì-sek;

³ bô-giân-bô-gú, bô-siaⁿ-bô-seh.

⁴ In ê siaⁿ-im thoân kàu choân sè-kài; in ê giân-sû thoân kàu thiⁿ-piⁿ-hái-kak. Siōng-tè ūi-tio̍h ji̍t-thâu tī thiⁿ-téng tah pò͘-pîⁿ.

⁵ Ji̍t-thâu chhin-chhiūⁿ sin-lông tùi tōng-pông chhut--lâi, chhin-chhiūⁿ soán-chhiú ióng-io̍k cháu i ê lō͘-thêng,

⁶ tùi thiⁿ ê chit-pêng chhut--lâi, se̍h kàu hit-pêng, jia̍t-khì phó͘-ki̍p bān-mi̍h.

⁷ Siōng Chú ê Lu̍t-hoat oân-choân, hō͘ lâng tit-tio̍h sin ê khùi-la̍t. Siōng Chú ê bēng-lēng khó-khò, hō͘ bô tì-sek ê lâng tit-tio̍h tì-hūi.

⁸ Siōng Chú ê lu̍t-lē kong-chèng, hō͘ lâng ê sim hoaⁿ-hí. Siōng Chú ê kài-bēng sûn-kiat, hō͘ lâng ê ba̍k-chiu kng-bêng.

⁹ Kèng-ùi Siōng Chú sī sûn-chin, éng-oán bô kái-piàn; Siōng Chú ê phòaⁿ-toàn chin-si̍t, oân-choân kong-tō,

¹⁰ pí kim, pí chin chōe sûn-kim khah kùi-tiōng; pí bi̍t, pí sûn ê phang-bi̍t koh-khah tiⁿ.

¹¹ Lu̍t-hoat hō͘ lí ê po̍k-jîn tit-tio̍h kéng-kài; siú kài-bēng chiū ū tōa pò-siúⁿ.

¹² Siáⁿ-lâng ōe chai ka-kī ê chhò-gō͘? Kiû lí sià-bián góa bô-ì-tiong hoān ê kè-sit!

¹³ Kiû lí pó-siú lí ê po̍k-jîn, hō͘ i bōe kò͘-ì hoān-chōe; kiû lí m̄-thang iông-ún chōe-ok koán-hat góa, góa chiū chiâⁿ-chòe bô thang chí-chek ê lâng, bōe hoān tāng-chōe.

¹⁴ Siōng Chú — góa ê pī-lān-só͘, góa ê Kiù-sio̍k-chú ah, goān góa ê chhùi só͘ kóng--ê ha̍h lí ê chí-ì; goān góa ê sim só͘ siūⁿ--ê tit-tio̍h lí chiap-la̍p.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan