Bìoball air-loidhne

Si-phian 18 - 現代台語譯本羅馬字版

Sèng-lī ê Koa
( 2 Sat 22.1-51 )
Siōng Chú ê po̍k-jîn Tāi-pi̍t ê si, kau hō͘ sèng-ga̍k-tiúⁿ. Siōng Chú kiù i thoat-lī só͘-ū ê tùi-te̍k kap Sò-lô ê chhiú liáu-āu, i ǹg Siōng Chú liām chit-siú si.

¹ Siōng Chú — góa ê khùi-la̍t ah, góa kèng-ài lí.

² Siōng Chú sī góa ê soaⁿ-giâm, góa ê iàu-sài, góa ê Chín-kiù-chiá; sī góa ê Siōng-tè, góa ê chio̍h-pôaⁿ, góa beh óa-khò I; I sī góa ê tún-pâi, kiù góa ê khùi-la̍t, góa ê pó-lúi.

³ Góa kiû-kiò eng-kai siū chheng-chàn ê Siōng Chú, góa chiū tit-tio̍h kái-kiù thoat-lī tùi-te̍k.

⁴ Sí-bông ê soh tîⁿ góa; húi-bia̍t ê tōa-chúi hō͘ góa kiaⁿ.

⁵ Im-hú ê soh khún-pa̍k góa; Sí-bông ê lô-bāng bāng-tio̍h góa.

⁶ Góa tī khó͘-lān tiong kî-kiû Siōng Chú, tùi góa ê Siōng-tè kiû-kiò; I tī I ê tiān-lāi thiaⁿ góa ê siaⁿ; góa tī I bīn-chêng ê khún-kiû ū ji̍p I ê hī-khang.

⁷ I siū-khì, tōe chiū iô-choah; soaⁿ ê tōe-ki mā tín-tāng iô koh choah.

⁸ Tùi I ê phīⁿ-khang ū ian chhèng-chhut; tùi I ê chhùi ū hé hoat-chhut, liân thô͘-thòaⁿ mā to̍h--khí-lâi.

⁹ I thí-khui thiⁿ, chhin-sin kàng-lîm; I kha-ē ū kāu-kāu ê o͘-hûn.

¹⁰ I khiâ thiⁿ-sài ki-lō͘-pek teh pe; I chē hong ê si̍t chhiong--lo̍h-lâi.

¹¹ I ēng o͘-àm chòe I ún-ba̍t ê só͘-chāi, ēng chúi kap ba̍t-hûn ûi khí-lâi chòe tiùⁿ-pâng.

¹² Peng-pha̍uh kap teh to̍h ê thòaⁿ tùi I lîm-chāi ê kng siā--chhut-lâi, tu̍t-phòa o͘-àm ê ba̍t-hûn.

¹³ Siōng Chú tùi thiⁿ-téng tân-lûi, Chì-koân ê Siōng-tè chhut-siaⁿ; koh ū lo̍h-pha̍uh kap teh to̍h ê thòaⁿ.

¹⁴ I siā-chìⁿ, hō͘ tùi-te̍k sì-sòaⁿ; I hoat-chhut sih-nà, hō͘ in hūn-loān.

¹⁵ Siōng Chú, lí chi̍t-ē chek-pī, lí phīⁿ-khang ê khùi chi̍t-ē chhut, hái-tóe chiū lō͘-chhut, tāi-tōe ê kun-ki mā lō͘-hiān.

¹⁶ I tùi téng-bīn chhun-chhiú khiú góa, tùi tōa-chúi kā góa kiù--chhut-lâi.

¹⁷ I kiù góa thoat-lī hiong-béng ê tùi-te̍k, thoat-lī oàn-hūn góa ê lâng; in-ūi in pí góa khah kiông.

¹⁸ Góa tú-tio̍h chai-lān ê sî, in lâi kong-kek góa; m̄-kú Siōng Chú sī góa ê óa-khò.

¹⁹ I chhōa góa kàu khui-khoah an-choân ê só͘-chāi; I kiù góa, in-ūi I ì-ài góa.

²⁰ Siōng Chú in-ūi góa chèng-ti̍t pò-tap góa, in-ūi góa ê só͘-chòe chheng-khì pò-siúⁿ góa.

²¹ Góa chun-siú Siōng Chú ê tō-lō͘, m̄-bat choh-pháiⁿ lī-khui góa ê Siōng-tè.

²² I só͘-ū ê bēng-lēng góa ū chun-siú; I ê kui-lē góa m̄-bat pàng-sak.

²³ Góa tī I ê bīn-chêng bô thang chí-chek; góa pó-siú ka-kī lī-khui chōe-ok.

²⁴ In-ūi góa chèng-ti̍t, Siōng Chú pò-siúⁿ góa; tī I ê ba̍k-chiu chêng, góa ê só͘-chòe chheng-khì.

²⁵ Chû-ài ê lâng, lí ēng chû-ài tùi-thāi i; sûn-choân ê lâng, lí ēng sûn-choân tùi-thāi i;

²⁶ chheng-khì ê lâng, lí ēng chheng-khì tùi-thāi i; m̄-kú, kan-chà ê lâng, lí ēng oan-khiau tùi-thāi i.

²⁷ Khùn-khó͘ ê lâng, lí kái-kiù i; chū-ko ê lâng, lí kā i kàng-kē.

²⁸ Lí tiám-to̍h góa ê teng; Siōng Chú — góa ê Siōng-tè kā góa ê o͘-àm pìⁿ-chòe kng-bêng.

²⁹ Góa in-ūi óa-khò lí, ōe-tàng kong-phòa te̍k-kun; óa-khò góa ê Siōng-tè, ōe-tàng thiàu-kè siâⁿ-chhiûⁿ.

³⁰ Chit-ūi Siōng-tè, I ê tō-lō͘ oân-choân. Siōng Chú ê ōe ū kè hé thoàn-liān; óa-khò I--ê, I chòe tún-pâi pó-hō͘ in.

³¹ Siōng Chú í-gōa, kiám ū pa̍t-ê Siōng-tè? Goán ê Siōng-tè í-gōa, kiám ū chio̍h-pôaⁿ thang óa-khò?

³² Chit-ūi Siōng-tè ēng khùi-la̍t chòe tòa hâ góa ê io; I ín-chhōa góa kiâⁿ an-choân ê lō͘.

³³ I hō͘ góa ê kha chhin-chhiūⁿ lo̍k gâu cháu, koh hō͘ góa khiā-chāi tī koân ê só͘-chāi.

³⁴ I hùn-liān góa ê chhiú gâu kau-chiàn, hō͘ góa ê chhiú ōe khui tâng ê keng.

³⁵ Lí ēng tún-pâi kái-kiù góa, ēng chiàⁿ-chhiú hû-chhî góa. Lí koàn-kò͘ góa, hō͘ góa ko-seng chòe tōa.

³⁶ Lí hō͘ góa ta̍h ê tōe khui-khoah an-choân; góa ê kha m̄-bat ta̍h-thu̍t.

³⁷ Góa tui góa ê tùi-te̍k kàu jip--tio̍h in; in bô bia̍t-bông, góa bōe tò-tńg.

³⁸ Góa phah in thiám-thiám, hō͘ in peh bōe khí--lâi, kàu in tó tī góa ê kha-ē.

³⁹ Lí sù góa khùi-la̍t hō͘ góa gâu kau-chiàn; lí hō͘ kong-kek góa ê lâng lóng hâng-ho̍k tī góa ē-bīn.

⁴⁰ Lí hō͘ góa ê tùi-te̍k oa̍t-tńg-sin tô-cháu, koh hō͘ góa châu-bia̍t oàn-hūn góa ê lâng.

⁴¹ In kiû-kiò, bô lâng kiù in; kiû-kiò Siōng Chú, I mā bô ìn.

⁴² Góa kā in tûi kàu chhùi-chhùi, chhin-chhiūⁿ thô͘-hún hō͘ hong chhe-sòaⁿ, kā in piàⁿ-chhut, chhin-chhiūⁿ koe-lō͘ ê thô͘-bê.

⁴³ Lí kiù góa thoat-lī hoán-poān góa ê jîn-bîn; lí siat-li̍p góa chòe lia̍t-pang ê thâu. Góa m̄-bat ê jîn-bîn ōe ho̍k-sāi góa;

⁴⁴ gōa-pang ê lâng khut-sin tâu-hâng, in chi̍t-ē thiaⁿ-tio̍h góa ê miâ chiū sūn-ho̍k.

⁴⁵ Gōa-pang ê lâng sit-táⁿ, kiaⁿ-hiâⁿ ngia̍uh-ngia̍uh-chhoah kiâⁿ-chhut in ê tīn-tōe.

⁴⁶ Siōng Chú éng-oán oa̍h--teh! Goān góa óa-khò ê chio̍h-pôaⁿ siū chheng-chàn; goān kiù góa ê Siōng-tè siū ko-kú.

⁴⁷ I chiū-sī ūi góa sin-oan hit-ūi Siōng-tè; I hō͘ chèng-lâng hâng-ho̍k tī góa kha-ē.

⁴⁸ I kiù góa thoat-lī góa ê tùi-te̍k. Siōng Chú ah, lí thê-poa̍t góa koân-kè kong-kek góa ê lâng; lí kiù góa thoat-lī kiông-pō ê lâng.

⁴⁹ Siōng Chú ah, in-ūi án-ni góa beh tī lia̍t-pang tiong kám-siā lí, chhiùⁿ-koa chheng-chàn lí ê miâ.

⁵⁰ Siōng Chú sù ke̍k-tōa ê kiù-un hō͘ I siat-li̍p ê ông, si-lo̍h chû-ài hō͘ I boah-iû soán-li̍p ê lâng, hō͘ Tāi-pi̍t kap i ê hō͘-tāi, ti̍t-kàu éng-oán.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan