Bìoball air-loidhne

Si-phian 17 - 現代台語譯本羅馬字版

Bû-ko͘ ê Lâng ê Kî-tó
Tāi-pi̍t ê kî-tó.

¹ Siōng Chú ah, kiû lí thiaⁿ kong-tō ê sò͘-kiû, liû-sim thiaⁿ góa ê kî-tó. Góa bô ēng kan-chà ê chhùi-tûn kî-tó, kiû lí àⁿ hī-khang lâi thiaⁿ.

² Kiû lí ēng ba̍k-chiu khòaⁿ-chhut sī-hui; kiû lí phòaⁿ góa bô chōe.

³ Lí ū khó-giām góa ê sim, liân mî--sî mā kàm-chhat góa; lí ēng hé thoàn-liān góa, bô chhē-tio̍h sím-mi̍h pháiⁿ. Góa li̍p-chì bô hō͘ góa ê chhùi ū kè-sit.

⁴ Góa chun-thàn lí só͘ kóng ê ōe, bô chhin-chhiūⁿ pa̍t-lâng ê kiâⁿ-chòe; góa kín-sīn bô kiâⁿ kiông-pō ê lâng ê lō͘.

⁵ Góa ê kha it-ti̍t kiâⁿ lí ê lō͘, m̄-bat phian-lī.

⁶ Siōng-tè ah, góa kiû-kiò lí, in-ūi lí ōe ìn góa; kiû lí àⁿ hī-khang thiaⁿ góa ê kî-tó.

⁷ Kiû lí hián-chhut lí kî-biāu put-piàn ê thiàⁿ, ēng chiàⁿ-chhiú kiù óa-khò lí ê lâng thoat-lī in ê tùi-te̍k.

⁸ Kiû lí pó-hō͘ góa, chhin-chhiūⁿ pó-hō͘ ba̍k-chiu-jîn, jia-khàm góa tī lí si̍t-ē.

⁹ Kiû lí hō͘ góa thoat-lī chhiúⁿ-kiap góa ê pháiⁿ-lâng, thoat-lī ûi-khùn góa beh hāi góa sìⁿ-miā ê tùi-te̍k.

¹⁰ In that-ba̍t lîn-bín ê sim; in ê chhùi kóng kiau-ngō͘ chū-tāi ê ōe.

¹¹ In tui-jip góa, hiān-chāi ûi-khùn góa; in ti̍t-ti̍t siòng beh kā góa siak-tó tī thô͘-kha.

¹² In chhin-chhiūⁿ sai siàu-siūⁿ beh thiah-chhùi góa, chhin-chhiūⁿ béng-sai bâi-ho̍k teh tng-tán.

¹³ Siōng Chú ah, kiû lí khí-lâi tùi-hù góa ê tùi-te̍k, hō͘ in khut-ho̍k, ēng lí ê to kiù góa ê sìⁿ-miā thoat-lī pháiⁿ-lâng.

¹⁴ Siōng Chú ah, kiû lí ēng lí ê chhiú kiù góa thoat-lī sè-kan-lâng, thoat-lī tī hiān-sè hióng-lo̍k ê sè-kan-lâng. Lí ēng lí ê châi-bu̍t tiùⁿ-móa in ê pak-tó͘, liân in ê kiáⁿ-jî mā tiùⁿ kah pá-pá, koh ū chhun, thang lâu hō͘ in ê kiáⁿ-sun.

¹⁵ Nā-sī góa, góa ōe khòaⁿ-kìⁿ lí ê bīn, in-ūi góa ê hêng-ûi chèng-ti̍t; góa khùn-chhíⁿ ê sî, lí ê lîm-chāi ōe hō͘ góa boán-chiok.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan