Si-phian 16 - 現代台語譯本羅馬字版

Sìn-khò ê Kî-tó
Tāi-pi̍t ê kim-si.

¹ Siōng-tè ah, kiû lí pó-hō͘ góa, in-ūi lí sī góa ê pī-lān-só͘.

² Góa bat tùi Siōng Chú kóng, “Lí sī góa ê Chú; chí-ū lí sī góa hēng-hok ê goân-thâu.”

³ Tōe-chiūⁿ ê sèng-tô͘ si̍t-chāi chin chun-kùi; kap in chòe-hé sī góa siōng-tōa ê hoaⁿ-hí.

⁴ Khì tè pa̍t-ê sîn-bêng ê lâng it-tēng ke-thiⁿ thòng-khó͘! Góa m̄ chham-ú in ê hiàn-chè, mā m̄ kèng-pài in ê sîn-bêng.

⁵ Siōng Chú, lí sī góa ê sán-gia̍p, góa ê hok-poe; lí kò͘-siú góa èng-tit ê hūn-gia̍h.

⁶ Lí chiong chin súi ê thó͘-tōe pun hō͘ góa; góa tit--tio̍h ê sán-gia̍p si̍t-chāi chin hó!

⁷ Góa beh chheng-chàn kà-sī góa ê Siōng Chú; mî--sî, góa ê sim chí-tiám góa.

⁸ Góa put-sî kám-siū Siōng Chú ê tông-chāi; I tī góa ê chiàⁿ-pêng, góa bōe tōng-iâu.

⁹ Só͘-í, góa ê sim hoaⁿ-hí, góa ê sîn khoài-lo̍k; góa ê jio̍k-thé an-jiân chū-chāi.

¹⁰ In-ūi lí bōe kā góa pàng-sak tī Im-hú, mā bōe hō͘ lí tiong-sêng ê chú-bîn lo̍h-khì Chhim-ian.

¹¹ Lí ōe chí-sī góa oa̍h-miā ê tō-lō͘. Tī lí bīn-chêng, góa ū móa-móa ê hoaⁿ-hí; tī lí chiàⁿ-pêng, góa ū éng-oán ê khoài-lo̍k.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan