Bìoball air-loidhne

Si-phian 148 - 現代台語譯本羅馬字版

Ú-tiū Lóng Tio̍h Chheng-chàn Siōng Chú

¹ Ha-lé-lú-iah, chheng-chàn Siōng Chú! Lín tio̍h tùi thiⁿ-téng chheng-chàn Siōng Chú, tī koân ê só͘-chāi o-ló I.

² I ê chèng sù-chiá ah, lín tio̍h chheng-chàn I. I ê chèng thian-kun ah, lín tio̍h o-ló I.

³ Ji̍t kap ge̍h ah, lín tio̍h chheng-chàn I; hoat-kng ê chhiⁿ-sîn ah, lín lóng tio̍h o-ló I.

⁴ Thiⁿ-téng ê thiⁿ, kap thiⁿ téng-bīn ê chúi ah, lín tio̍h o-ló I.

⁵ Chiah-ê lóng tio̍h chheng-chàn Siōng Chú ê miâ, in-ūi I chi̍t-ē bēng-lēng, it-chhè chiū chō-sêng.

⁶ I chiong chiah-ê an-tì hó-sè, éng-oán bōe piàn-chhian; I tēng kui-lē, éng-oán bōe hòe-bô.

⁷ Lín tio̍h tùi tōe-chiūⁿ chheng-chàn Siōng Chú; tōa-hî kap só͘-ū ê chhim-hái,

⁸ sih-nà kap peng-pha̍uh, seh kap hûn-bū, thiaⁿ I ê ōe ê kông-hong, lín lóng tio̍h chheng-chàn Siōng Chú!

⁹ Só͘-ū ê tōa-soaⁿ kap sió-soaⁿ, ké-chí-chhiū kap pek-hiuⁿ-chhiū,

¹⁰ só͘-ū ê iá-siù kap cheng-siⁿ, thâng-thōa kap pe-chiáu, lín lóng tio̍h chheng-chàn Siōng Chú!

¹¹ Tōe-chiūⁿ só͘-ū ê kun-ông kap jîn-bîn, kùi-cho̍k kap thóng-tī-chiá,

¹² siàu-liân-lâng kap chāi-sek-lú, lāu-lâng kap gín-á, lín lóng tio̍h chheng-chàn Siōng Chú!

¹³ Lín chiah-ê lóng tio̍h chheng-chàn Siōng Chú ê miâ, in-ūi chí-ū I ê miâ siū chun-chông, I ê êng-kng pôaⁿ-kè thiⁿ kap tōe.

¹⁴ I hō͘ I ê chú-bîn kiông-sēng, hō͘ I sèng ê chú-bîn lóng chheng-chàn I, chiū-sī hiah-ê chhin-kūn Chú ê Í-sek-lia̍t chú-bîn. Ha-lé-lú-iah, chheng-chàn Siōng Chú!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan