Bìoball air-loidhne

Si-phian 147 - 現代台語譯本羅馬字版

Chheng-chàn Choân-lêng ê Siōng-tè

¹ Ha-lé-lú-iah, chheng-chàn Siōng Chú! Chhiùⁿ-koa o-ló lán ê Siōng-tè, chin hó; chheng-chàn I sī ha̍p-gî, chin thang hoaⁿ-hí.

² Siōng Chú tiông-kiàn Iâ-lō͘-sat-léng, chū-chi̍p Í-sek-lia̍t tiong siū-lia̍h khì īⁿ-pang ê lâng.

³ I i-hó siong-sim ê lâng, pau-chat in ê siong.

⁴ I sǹg chhiⁿ-sîn ê sò͘-bo̍k, chi̍t-lia̍p chi̍t-lia̍p kā in hō-miâ.

⁵ Lán ê Chú chì-tōa, ū tōa khùi-la̍t; I ê tì-hūi bû-kiông-chīn.

⁶ Siōng Chú hû-chhî pi-bî ê lâng, kā pháiⁿ-lâng phah-tó tī thô͘-kha.

⁷ Lín tio̍h ēng kám-siā ǹg Siōng Chú chhiùⁿ-koa, tôaⁿ-khîm chhiùⁿ-koa, o-ló lán ê Siōng-tè.

⁸ I khí-hûn jia-thiⁿ, ūi-tio̍h tōe chún-pī hō͘-chúi, hō͘ soaⁿ hoat-chháu.

⁹ I sù chia̍h-mi̍h hō͘ cháu-siù, hō͘ teh thó-chia̍h ê sòe-chiah o͘-a.

¹⁰ I ì-ài--ê m̄-sī bé ê la̍t tōa; I hoaⁿ-hí--ê m̄-sī lâng ê kha gâu-cháu.

¹¹ Siōng Chú ì-ài--ê sī kèng-ùi I, gióng-bōng I chû-ài ê lâng.

¹² Iâ-lō͘-sat-léng ah, tio̍h chheng-chàn Siōng Chú; Sek-an ah, tio̍h siōng-chàn lí ê Siōng-tè.

¹³ In-ūi I kian-kò͘ lí siâⁿ-mn̂g ê mn̂g-chhòaⁿ, sù-hok hō͘ siâⁿ-lāi ê lâng.

¹⁴ I hō͘ lí kéng-lāi pêng-an, ēng siōng-hó ê be̍h hō͘ lí chia̍h pá.

¹⁵ I ǹg tōe hoat-chhut bēng-lēng; I ê ōe thoân-pò͘ chin kín.

¹⁶ I lo̍h-seh chhin-chhiūⁿ iûⁿ-mn̂g, lo̍h-sng chhin-chhiūⁿ hé-hu.

¹⁷ I lo̍h-pha̍uh chhin-chhiūⁿ iù-chio̍h; I thàu léng-hong, siáⁿ-lâng tòng ōe tiâu?

¹⁸ I chi̍t-ē bēng-lēng, chiah-ê chiū lóng iûⁿ--khì; I khí hong, chúi chiū lâu.

¹⁹ I ēng I ê ōe chí-sī Ngá-kok, chiong I ê bēng-lēng kap kui-lē chí-sī Í-sek-lia̍t.

²⁰ I m̄-bat án-ni khoán-thāi pa̍t-kok; I ê kui-lē, in m̄ bat. Ha-lé-lú-iah, chheng-chàn Siōng Chú!

The Bible Society in Taiwan

Lean sinn:

Ceanglaichean taic

Sanasan