Si-phian 146 - 現代台語譯本羅馬字版

Chheng-chàn Kong-gī ê Siōng Chú

¹ Ha-lé-lú-iah, chheng-chàn Siōng Chú! Góa ê sim-sîn ah, tio̍h chheng-chàn Siōng Chú!

² Góa it-seng beh chheng-chàn Siōng Chú; góa oa̍h ê ji̍t lóng beh chhiùⁿ-koa chheng-chàn góa ê Siōng-tè.

³ M̄-thang óa-khò kun-ông; m̄-thang óa-khò ōe-sí ê lâng, in bōe-tàng pang-chān.

⁴ In chi̍t-ē tn̄g-khùi chiū kui-thó͘; in ê kè-ōe tī hit-ji̍t chiū lo̍k-khong.

⁵ Khò Ngá-kok ê Siōng-tè pang-chān ê lâng chin ū hok-khì! Siōng Chú — in ê Siōng-tè sī in ê ǹg-bāng.

⁶ I chhòng-chō thiⁿ, tōe, hái, mā chhòng-chō kî-tiong bān-mi̍h. I éng-oán sìn-si̍t.

⁷ I ūi-tio̍h siū óng-khut ê lâng sin-oan; I sù chia̍h-mi̍h hō͘ iau-gō ê lâng. Siōng Chú tháu-pàng siū koaiⁿ-kaⁿ ê lâng;

⁸ Siōng Chú hō͘ bông-jîn ōe khòaⁿ--kìⁿ. Siōng Chú hû-khí siū ap-chè ê lâng; Siōng Chú thiàⁿ-sioh gī-lâng.

⁹ Siōng Chú pó-hō͘ chhut-gōa-lâng, hû-chhî ko͘-jî kóaⁿ-hū. I hō͘ pháiⁿ-lâng ê lō͘ kiâⁿ bōe thong.

¹⁰ Siōng Chú ōe éng-oán choh-ông; Sek-an ah, lí ê Siōng-tè beh choh-ông, ti̍t-kàu bān-tāi! Ha-lé-lú-iah, chheng-chàn Siōng Chú!

The Bible Society in Taiwan

Lean sinn:

Ceanglaichean taic

Sanasan